Kërkesa e kancelarit Merz
Në Samitin Dixhital në Berlin, kancelari gjerman Friedrich Merz kërkoi që Gjermania dhe Europa ta përshpejtojnë zhvillimin e inteligjencës artificiale. Me këtë hap, ai synon të forcojë aftësinë konkurruese dhe të zvogëlojë varësinë teknologjike nga SHBA-ja dhe Kina.
Në fjalën e tij, Merz theksoi se zhvillimi i teknologjive digjitale dhe zbatimi i tyre në praktikë kërkojnë më shumë shpejtësi dhe efikasitet, si nga Gjermania ashtu edhe nga Europa.
Strategjia dhe objektivat e qeverisë gjermane
Strategjia e paraqitur nga kancelari mbështetet në dy shtylla: përhapjen e përdorimit të inteligjencës artificiale në industri dhe biznese në afat të shkurtër, dhe forcimin e kërkimit për modele të reja të AI-së në perspektivë afatgjatë.
Për të arritur më shumë pavarësi në fushën teknologjike, ndër objektivat kryesore janë zgjerimi i bashkëpunimit me shtete si Franca dhe Kanadaja, si dhe diversifikimi i zinxhirëve të furnizimit.
Ambicia e qeverisë gjermane është që Gjermania të bëhet një „Komb i Inteligjencës Artificiale“ deri në vitin 2030. Plani parashikon që, brenda këtij afati, inteligjenca artificiale të përdoret nga të paktën 80 për qind e ndërmarrjeve të mëdha dhe 55 për qind e bizneseve të vogla dhe të mesme.
Objektivat përfshijnë gjithashtu trefishimin e numrit të start-up-eve që veprojnë në këtë fushë, ndërsa kontributi i inteligjencës artificiale në ekonominë gjermane synohet të kalojë 10 për qind.
Merz tha se inteligjenca artificiale do ta transformojë ndjeshëm tregun e punës dhe do të rrisë produktivitetin. Sipas tij, frika nga rreziqet nuk duhet të pengojë zhvillimin e saj, i cili duhet të orientohet nga vlerat njerëzore dhe interesat e sigurisë.
Ndërkohë, ekspertët shprehin shqetësimin se, në konkurrencën botërore për inteligjencën artificiale, Gjermania mund të mbetet prapa SHBA-së dhe Kinës.
Raporti i grupit të punës për AI e cilëson periudhën e ardhshme, prej 12 deri në 18 muajsh, si përcaktuese për aftësinë e vendit për të zvogëluar hendekun teknologjik dhe për të konsoliduar pozicionin e tij ndërkombëtar.
Burimi: www.albeu.com
