Përparimi i inteligjencës artificiale
Modelet e avancuara të inteligjencës artificiale kanë arritur një përparim të dukshëm. Në disa fusha, ato i kalojnë aftësitë e shkencëtarëve më të mirë dhe mund të kryejnë një pjesë të madhe të detyrave që kryejnë punonjësit. Kështu deklaroi të hënën drejtori ekzekutiv i OpenAI, Sam Altman.
Duke folur në ceremoninë e hapjes së Ekspozitës dhe Konferencës Ndërkombëtare të Naftës në Abu Dhabi, Emiratet e Bashkuara Arabe, Altman u ndal te zhvillimi i shpejtë i teknologjisë së inteligjencës artificiale gjatë vitit të fundit.
„Në fillim të këtij viti, inteligjenca artificiale nuk ishte përgjithësisht aq e zgjuar sa shkencëtari ynë më i mirë, ndërsa tani është përgjithësisht më e zgjuar se ata”, tha Altman.
Ai theksoi se, ndonëse më parë IA nuk mund të kryente shumë detyra profesionale, sot mund të realizojë një pjesë të madhe të punëve të lidhura me profesionet e zyrës.
Megjithatë, kreu i OpenAI nënvizoi se gjykimi njerëzor, kreativiteti dhe përgjegjësia duhet të mbeten elemente thelbësore në përdorimin e kësaj teknologjie. „Mendojmë se është absolutisht e rëndësishme që njerëzit të mbeten në kontroll të së ardhmes. Nuk duhet të ketë kalim te IA-ja, dhe nuk duhet të ketë një ‘do ta lëmë IA-në të vendosë se çfarë është më e mira për ne'”, deklaroi ai.
„IA duhet të jetë një mjet i ndërtuar për njerëzit dhe duhet t’u shërbejë atyre, e jo anasjelltas”, shtoi Altman.
Energjia dhe infrastruktura
Një çështje tjetër e rëndësishme e trajtuar në fjalim ishte konsumi i lartë i energjisë elektrike nga qendrat e të dhënave dhe infrastruktura kompjuterike që mbështet inteligjencën artificiale.
Altman e përshkroi furnizimin me energji si pengesën kryesore për zhvillimin e mëtejshëm të sektorit. Sipas tij, kapacitetet fizike për prodhimin dhe furnizimin me energji do të përcaktojnë shpejtësinë e përparimit teknologjik.
„Në çdo aspekt tjetër do të bëjmë përparim të madh, por atomet janë ende atome, dhe bota fizike që duhet ta fuqizojë këtë do të jetë faktori dominues i kostos dhe i bollëkut”, përfundoi ai.
Burimi: euronews.al
