LONDËR, 3 nëntor /ATSH/ – Elefantët afrikanë luajnë një rol të rëndësishëm në ekuilibrin ekologjik të savanës, dhe ndikimi i tyre në mjedis nuk mbaron me vdekjen. Një studim i ri, i botuar në revistën shkencore “Proceedings of the National Academy of Sciences”, tregon se trupat e elefantëve vazhdojnë ta ndryshojnë ekosistemin deri në tetë vjet pas dekompozimit të plotë, sipas focus.it.
Studimi i ri mbi trupat e elefantëve
Studimi, i kryer nga një ekip hulumtuesish të Universitetit të Kalifornisë në Santa Barbara (UC Santa Barbara), shqyrton ndikimin e mbetjeve të këtyre kafshëve te toka dhe te rigjenerimi i bimësisë.
Gjithçka filloi në vitin 2009, kur studiuesi Dave Thompson dokumentoi ngordhjen e një prej elefantëve të njohur të Parkut Kombëtar Kruger në Afrikën e Jugut, të quajtur Alexander.
Duke vëzhguar për disa muaj procesin e dekompozimit të trupit të kafshës, Thompson u interesua për mënyrën se si këto mbetje ndikojnë në mjedisin përreth. Ky vëzhgim shërbeu si bazë për një studim më të gjerë, rezultatet e të cilit u publikuan 17 vjet më vonë.
Ndikimi në bimësi dhe tokë
Sipas studiuesve, një nga efektet e para të ngordhjes së elefantëve është zhdukja e bimësisë në zonën ku bie trupi i tyre. Për shkak të madhësisë së madhe, kufoma mbulon dhe shkatërron bimësinë ekzistuese, duke krijuar një hapësirë ku komunitetet bimore pësojnë ndryshim të plotë.
Gjatë dekompozimit, trupi lëshon në tokë sasi të mëdha lëndësh ushqyese, sidomos azot, por edhe përbërës si amoniaku, të cilët në fazat e para e pengojnë rigjenerimin e bimëve. Ndërkohë, bakteret e tokës përfitojnë nga përqendrimi i lartë i lëndëve ushqyese.
Me kalimin e kohës, përbërësit toksikë zbërthehen ose largohen nga toka dhe bimësia fillon të rikthehet. Së pari shfaqen disa lloje bimësh që rriten shpejt, ndërsa më pas rikthehen gradualisht edhe speciet më të mëdha.
Megjithatë, ky proces përballet me një pengesë tjetër: bimësia e rigjeneruar është veçanërisht e pasur me lëndë ushqyese, që tërheq shpejt barngrënësit, të cilët ushqehen me të.
Për të studiuar më mirë këtë proces, ekipi kërkimor ka rrethuar me gardh disa zona ku janë gjetur mbetjet e elefantëve, me qëllim vëzhgimin e rritjes së bimësisë pa ndërhyrjen e kafshëve të tjera.
Gjetjet konfirmojnë se ndikimi ekologjik i elefantëve është shumë më i gjerë nga sa mendohej, pasi ata vazhdojnë ta formësojnë mjedisin natyror edhe shumë kohë pas vdekjes. /os/
Burimi: ata.gov.al
