Platforma Nacionale e Identitetit Elektronik
Ministria e Digjitalizimit dhe Administratës Publike ka paraqitur Platformën Nacionale të Identitetit Elektronik dhe Kuletës Dixhitale.
Ky hap u vlerësua si një ndryshim thelbësor në fushën dixhitale, sepse u jep qytetarëve dhe bizneseve mundësinë për t’u identifikuar dhe për të nënshkruar dokumente në formë elektronike.
Kryeministri i Kosovës, Albin Kurti, deklaroi se digjitalizimi po ndryshon mënyrën se si qytetarët marrin shërbimet publike, duke i afruar institucionet me ta pa qenë nevoja për prani fizike.
Sipas tij, falë kësaj platforme qytetarët do të kursejnë kohë, do të shmangin udhëtimet e panevojshme dhe do t’i kryejnë procedurat administrative nga çdo vendndodhje, pa u detyruar të printojnë dokumente.
Kurti e cilësoi këtë platformë, bashkë me aplikacionin për nënshkrim elektronik „iSign“, si një hap të rëndësishëm në transformimin dixhital të Kosovës.
Në fjalimin e tij, ai theksoi se kalimi nga vizitat në zyra te qasja në shërbime kudo dhe në çdo kohë do të thotë që institucionet praktikisht i afrohen qytetarit, e jo anasjelltas. Sipas kryeministrit, digjitalizimi lidhet me kohën e kursyer, me udhëtimet që nuk do të jenë më të nevojshme, me punën që përfundon aty ku ndodhet qytetari dhe me dokumentin që nuk ka më nevojë të printohet. Me lansimin e platformës kombëtare të Identitetit Elektronik dhe Kuletës Dixhitale dhe të aplikacionit „iSign“, shtoi ai, Republika e Kosovës po shënon një përparim të rëndësishëm në rrugën e saj dixhitale.
Mbështetja e Bashkimit Evropian
Ambasadori i Bashkimit Evropian në Kosovë, Dirk Schuebel, njoftoi se Bashkimi Evropian ka investuar 2.3 milionë euro në këtë platformë.
Ai theksoi se ky investim është pjesë e një partneriteti më të gjerë mes BE-së dhe Kosovës, ku BE-ja është partnerja dhe donatorja më e madhe e vendit, duke ndihmuar modernizimin dhe integrimin e Kosovës në BE. Falë këtij bashkëpunimi, shtoi Schuebel, qytetarët e Kosovës tani mund të kenë një identitet të sigurt dixhital në telefonat e tyre.
Edhe ministri i këtij dikasteri, Lulëzon Jagxhiu, e vlerësoi këtë si një hap të rëndësishëm në transformimin dixhital të vendit.
Ai shpjegoi se në jetën e përditshme qytetarët e përdorin telefonin për të komunikuar, për të paguar dhe për të kryer shumë punë, por kur duhej të vërtetonin identitetin ose të nënshkruanin një dokument, shpesh detyroheshin të paraqiteshin fizikisht ose të merrnin dokumente në letër. Sipas tij, tani këto veprime mund të kryhen në mënyrë dixhitale, ndërsa identiteti elektronik përbën një nga themelet e besimit në shërbimet dhe transaksionet dixhitale.
Burimi: www.albeu.com
