Gjendja e rasteve të fruthit
Instituti Kombëtar i Shëndetësisë Publike i Kosovës (IKShPK) ka raportuar 269 raste të fruthit në vend në periudhën nga 16 prilli deri më 1 nëntor. Nga këto, 27 raste janë evidentuar vetëm gjatë javës së fundit. Sëmundja është përhapur në 23 komuna, ndërsa më shumë se 95 për qind e të prekurve nuk kishin qenë të vaksinuar me MMR.
Sipas të dhënave të IKShPK-së, shumica e rasteve janë regjistruar te fëmijët. Kjo e ka rritur shqetësimin për nivelin e mbulimit me vaksinë dhe rrezikun e përhapjes së mëtejshme të sëmundjes, sipas Gazetës Shneta.
IKShPK kujton se vaksina MMR mbron nga tri sëmundje infektive: fruthi, parotiti dhe rubeola. Vaksinimi mbetet mjeti kryesor për parandalimin e tyre.
Fruthi është sëmundje ngjitëse dhe mund të shkaktojë komplikime serioze, sidomos te fëmijët e vegjël.
Sipas institutit, vaksinimi në kohën e duhur mbron jo vetëm fëmijët e vaksinuar, por edhe komunitetin, përfshirë foshnjat dhe personat që nuk mund të vaksinohen për arsye shëndetësore.
Vaksinimi plotësues për fëmijët
Krahas vaksinimit sipas kalendarit të rregullt, IKShPK-ja, në bashkëpunim me institucionet shëndetësore, vazhdon edhe vaksinimin plotësues për fëmijët që nuk janë vaksinuar ose nuk i kanë marrë të dy dozat e parashikuara.
Gjatë këtij viti, përmes këtyre aktiviteteve, janë vaksinuar mbi 4 mijë e 6 fëmijë të moshës 2 deri në 5 vjeç.
IKShPK u bën thirrje prindërve që të kontrollojnë statusin e vaksinimit të fëmijëve. Nëse mungon ndonjë dozë, prindërit duhet të kontaktojnë ekipet e vaksinimit sa më shpejt për ta plotësuar atë.
IKShPK nënvizon se vaksinimi i rregullt dhe ai plotësues janë të rëndësishëm për rritjen e mbrojtjes së fëmijëve dhe ndërprerjen e përhapjes së fruthit./Gazeta Shneta
Burimi: ekonomiaonline.com
