SIDNEJ, 3 nëntor /ATSH-AA/ – Kryeministri i Australisë, Anthony Albanese, paralajmëroi sot se polarizimi politik në rritje po dëmton kohezionin shoqëror dhe po vë institucionet demokratike nën presion gjithnjë e më të madh në mbarë botën.
Duke folur në Takimin e Kryetarëve të Qeverive të Komonuelthit në Saint John’s, Antigua dhe Barbuda, Albanese u bëri thirrje liderëve të forcojnë mbrojtjet demokratike dhe të mbrojnë nga dhuna përfaqësuesit e zgjedhur.
“Në mbarë botën, polarizimi politik po e zvogëlon kohezionin shoqëror dhe po shton presionin mbi proceset demokratike”, tha ai, sipas një transkripti të publikuar nga zyra e tij.
Kërcënimet ndaj politikanëve
Albanese theksoi se kërcënimet ndaj politikanëve, veçanërisht ndaj grave, po shtohen, dhe disa prej tyre përfundojnë me sulme dhe vrasje të rënda. Ai përmendi sulmin e fundit ndaj ligjvënëses australiane Helen Haines, e cila pësoi lëndime të rënda dhe mbetet në gjendje serioze.
Më 19 tetor, Haines, 65 vjeç, u goditi nga një automjet jashtë zyrës së saj zgjedhore në Wangaratta, Victoria, dhe mjekët u detyruan t’i amputonin të dy këmbët.
Kryeministri tha se incidenti nënvizoi nevojën urgjente për mbrojtjen e përfaqësuesve të zgjedhur dhe mbështeti iniciativat e Komonuelthit për përmirësimin e sigurisë së tyre. Ai shtoi se konfliktet në Ukrainë dhe Lindjen e Mesme kanë një ndikim “shkatërrues” në ekonominë globale.
Albanese riafirmoi thirrjet e Australisë që Rusia t’i japë fund luftës ndaj Ukrainës, për një armëpushim në Lindjen e Mesme dhe për rihapjen e Ngushticës së Hormuzit, si dhe për rivendosjen e lirisë së lundrimit dhe tregtisë.
Ai u bëri thirrje anëtarëve të Komonuelthit t’i përballojnë dezinformimin, ndërhyrjen në zgjedhje dhe keqpërdorimin e inteligjencës artificiale, duke paralajmëruar se platformat dixhitale po nxisin përçarje dhe dhunë.
Sipas tij, Australia mbështet ruajtjen e kontrollit njerëzor mbi “zhvillimin dhe vendosjen” e inteligjencës artificiale. Albanese bëri thirrje për bashkëpunim më të fortë ndërkombëtar mbi ndryshimet klimatike, veçanërisht për mbrojtjen e vendeve ishullore të cenueshme në Paqësor. /os/
Burimi: ata.gov.al
