Testi i raketës lundruese
Agjencia zyrtare e lajmeve KCNA njoftoi sot se Koreja e Veriut kreu një provë me një raketë strategjike lundruese. Testi vjen pas provave me raketa lundruese që mund të mbajnë municione thërrmuese.
Sipas KCNA-së, provën e kryer dje synohej të përmirësonte manovrimin e raketës në fazën e fundit të fluturimit, duke rritur kështu aftësinë e saj për të goditur vertikalisht një objektiv.
Agjencia pretendoi se një kokë luftarake me fuqi të mesme, e montuar në një raketë lundrimi, mund të shndërrojë në hi një sipërfaqe prej pesë deri në gjashtë hektarësh (50 deri në 60 mijë metra katrorë), kur përdoret me fuqinë maksimale.
Për raketat me municione thërrmuese të testuara nga Koreja e Veriut u pohua gjithashtu se ato mund të shndërrojnë në hi 60 hektarë.
Një zyrtar verikorean e shpjegoi testin me nevojën që forcat e armatosura të sigurojnë mbrojtjen e vendit dhe të parandalojnë kërcënimet e çdo lloji.
Provat e tjera me armatime
Në javët e fundit, Koreja e Veriut ka testuar disa lloje armësh, ndër to raketa hipersonike, municione thërrmuese dhe dronë nënujorë, të cilët përbëjnë një lloj torpedoje të drejtuar.
Sipas Phenianit, provat me raketa lundruese nuk janë të ndaluara, ndryshe nga ato me raketa balistike. Ndërkohë, Koreja e Jugut nuk njoftoi për asnjë stërvitje të Koresë së Veriut as të dielën, as të hënën.
Gjatë një komunikimi me gazetarët të hënën, Jang Do-yang, zëdhënës i Shtabit të Përbashkët të Koresë së Jugut, shpjegoi se vendimi për të bërë publike apo jo njoftimet mbështetet në një vlerësim të plotë ushtarak. Sipas tij, ky vlerësim merr parasysh mbrojtjen e aseteve dhe të aftësive të mbikëqyrjes e zbulimit, sigurinë operacionale dhe faktorë të tjerë.
Ai theksoi gjithashtu se ushtria e Koresë së Jugut nuk bën publike çdo lëshim të kryer nga Koreja e Veriut.
Burimi: www.albeu.com
