Reagimi i Koresë së Veriut
Koreja e Veriut ka hedhur poshtë akuzat e SHBA-së që e lidhin atë me një vjedhje kriptomonedhash me vlerë miliarda dollarësh, e cila përfshin platformën Binance. Phenjani e akuzon Uashingtonin se përdor akuzat për krime kibernetike për të dëmtuar imazhin e saj ndërkombëtar.
Kim Yo Jong, motra me ndikim e udhëheqësit Kim Jong Un dhe një zyrtare e lartë e Partisë së Punëtorëve, i përshkroi akuzat si një “provokim të rëndë politik”.
Ajo tha se FBI përpiqet ta paraqesë Korenë e Veriut si një “shtet kriminal kibernetik”, duke pretenduar se një grup hakerësh të mbështetur nga Pheniani ka qenë i përfshirë në vjedhje.
“Pohimi i SHBA-së është retorikë absurde dhe nuk ka asgjë të re”, tha Kim në një deklaratë. Ajo akuzoi Uashingtonin se fajëson rregullisht Korenë e Veriut për sulme të mëdha kibernetike ndërkombëtare pa paraqitur prova të besueshme.
Akuzat për vjedhjen e kriptomonedhave
Kim përmendi gjithashtu akuzat e SHBA-së që e lidhin Phenianin me vjedhjen e kriptomonedhave të vitit të kaluar, e cila përfshinte bursën Bybit.
Koreja e Veriut i ka mohuar vazhdimisht akuzat e SHBA-së për sulme kibernetike të sponsorizuara nga shteti. Ndërkohë, Uashingtoni i ka akuzuar grupet e hakerëve të Koresë së Veriut se vjedhin aktive dixhitale për të financuar programet e armëve të vendit.
Kim sugjeroi se Uashingtoni mund të përfitonte nga rikuperimi i kriptomonedhave të vjedhura, duke iu referuar planeve të SHBA-së për krijimin e një rezerve strategjike kriptomonedhash.
Ajo tha se Pheniani po monitoron nga afër provokimet e SHBA-së dhe se qëndrimi armiqësor i Uashingtonit mund ta detyrojë atë të rishqyrtojë qëndrimin e saj për disa çështje.
Burimi: euronews.al
