Shkrirja e bashkive dhe reforma territoriale
Pas dekretit të datës 9 maj 2027 për zgjedhjet lokale, presidenti Bajram Begaj miratoi ndarjen e re territoriale të vendit, e cila u votua në Kuvend pa pjesëmarrjen e opozitës. Shefi i shtetit firmosi shkrirjen e 15 bashkive pa njoftim publik të veçantë. Dekreti u bë i njohur vetëm pasi u publikua në kategorinë e dekreteve në faqen zyrtare. Njëkohësisht, socialistët vazhdojnë projektin e tyre, duke rifilluar Komisionin për Reformën Territoriale, ku kanë shumicën e anëtarëve, për të punuar mbi kompetencat, financat dhe rajonizimin.
“Ne themi: bashkia ka këto 10 funksione. Për këto 10 funksione ka këto para që i gjeneron vetë nga taksat dhe tarifat, këto para që ia jep qeveria dhe këto para që i vijnë si mekanizëm ekualizimi, domethënë i vijnë një bashkie sepse është më e varfër ose ka më pak mundësi për të gjeneruar të ardhura vetë”, shpjegon Arbjan Mazniku. Socialistët e mbështesin shkrirjen e bashkive me argumentin se njësitë më të mëdha do të kenë mundësi të kryejnë më shumë funksione. Megjithatë, mbetet e hapur sa e gatshme është qeveria t’i lërë pushtet vendorëve.
Rajonet dhe drejtimi i tyre
“Në disa fusha bashkitë, dhe ky është besimi im personal, mund të kenë më shumë kompetenca, ndërsa në disa fusha duhet të kenë më pak kompetenca. Menaxhimi i digave duhet të bëhet në nivel të përqendruar. Nuk mund të bëhet nga bashkitë. Bashkitë duhet të kenë një rol më të madh në shëndetin parësor, në menaxhimin e ambulancave të lagjeve, ambulancave të fshatrave dhe qendrave shëndetësore të fshatrave”, tregon Mazniku për ”A2cnn”.
Ai nuk e përjashton as mundësinë që Tirana të bëhet një rajon më vete. “Tirana i ka të gjitha parametrat për të qenë një rajon më vete”. Forcat e majta preferojnë katër rajone, por mbetet e pazgjidhur se si do të përzgjidhen drejtuesit e tyre: drejtpërdrejt nga populli apo me një formulë tjetër? “Unë mendoj që në një fazë të parë, prej katër deri në tetë vjetësh, rajonet duhet të jenë mekanizma përfaqësimi nga këshillat bashkiakë dhe kryetarët e bashkive të rajonit. Më pas mund të shohim opsionin e një zgjedhjeje të drejtpërdrejtë, por kjo në një fazë të mëtejshme. Disa funksione që bashkitë nuk i bëjnë dot, i agregojnë në nivel rajonal. Rajonet duhet të kenë potencialisht burimet e tyre financiare”.
Burimi: kohajone.com
