BERLIN, 2 nëntor /ATSH-DPA/- Ish-kancelarja e Gjermanisë, Angela Merkel, do të marrë pjesë në konventën që do të zgjedhë presidentin e ri të vendit vitin e ardhshëm, si përfaqësuese e partisë konservatore Bashkimi Kristian Demokrat (CDU). Pjesëmarrja e Merkel u raportua nga disa media.
Presidenca është kryesisht një detyrë ceremoniale. Presidentin e zgjedhin të gjithë anëtarët e Bundestagut, domethënë Dhoma e Ulët e parlamentit, bashkë me një numër të barabartë përfaqësuesish të zgjedhur nga parlamentet e 16 shteteve federale të Gjermanisë.
Pasuesi i presidentit aktual, Frank-Walter Steinmeier, do të zgjidhet më 30 janar 2027.
Shtetet federale të Gjermanisë po zgjedhin aktualisht përfaqësuesit e tyre për konventën, ndonëse qeveria e koalicionit të konservatorëve dhe socialdemokratëve të kancelarit Friedrich Merz nuk ka rënë ende dakord për një kandidat.
Ish-kancelarja, e cila do ta përfaqësojë CDU-në në landin verior Schleswig-Holstein, bëri kohët e fundit thirrje që Steinmeier të zëvendësohet nga një grua.
“Në historinë 77-vjeçare të Republikës Federale të Gjermanisë, nuk ka pasur kurrë një grua si presidente federale”, tha Merkel në një intervistë për “MagentaTV”. //a.i/
Burimi: ata.gov.al
