Qëndrimi i PDK-së për rikthimin e ligjit
Deputetja e Partisë Demokratike të Kosovës, Ariana Musliu-Shoshi, u shpreh për “Front Online” lidhur me rikthimin në Kuvend të Ligjit për Specialen, pasi presidentja e ktheu për rishqyrtim. Sipas saj, PDK-ja synon që ligji të rishqyrtohet me qëllim fuqizimin e tij juridik, e jo që të anulohet.
Musliu-Shoshi theksoi se qëllimi i partisë së saj mbetet mbrojtja e të drejtave të çlirimtarëve të UÇK-së dhe garantimi i një procesi gjyqësor të drejtë.
“Para së gjithash, dëshiroj të sqaroj se PDK-ja nuk ka kërkuar anulimin e ligjit, por rishqyrtimin e tij për ta fuqizuar juridikisht. Qëllimi ynë mbetet i njëjtë: mbrojtja e të drejtave të çlirimtarëve të UÇK-së dhe garantimi i një procesi gjyqësor të drejtë”, deklaroi ajo.
Ajo shprehu pritshmërinë që komisioni përgjegjës parlamentar t’i shqyrtojë rekomandimet profesionale të paraqitura në fazën përfundimtare të miratimit të ligjit, të cilave, sipas saj, nuk u kishte mbetur kohë t’u përgjigjeshin atëherë.
Lidhur me ndryshimet e mundshme në ligj, deputetja e PDK-së njoftoi se aktualisht po shqyrtohen disa zgjidhje juridike. Ajo theksoi se do të ishte e papërshtatshme t’i paragjykonin këto zgjidhje para se të arrihej marrëveshja përfundimtare.
“Sa i përket ndryshimeve konkrete, aktualisht po shqyrtohen disa zgjidhje juridike dhe nuk do të ishte serioze t’i paragjykonim përpara se të arrihet një marrëveshje përfundimtare”, tha ajo.
Thirrje për përgjegjësi të përbashkët
Musliu-Shoshi iu drejtua edhe deputetëve që kundërshtojnë rikthimin e ligjit, duke kujtuar se ai është miratuar nga Kuvendi në tërësi, e jo vetëm nga grupi parlamentar i PDK-së.
“Lidhur me deputetët që kundërshtojnë rikthimin, dua t’u kujtoj se ky ligj është votuar nga Kuvendi, jo vetëm nga PDK-ja. Prandaj, përgjegjësia për përmbylljen e këtij procesi është e përbashkët”, deklaroi Musliu-Shoshi.
Ajo kërkoi vullnet politik dhe përgjegjësi institucionale, duke kundërshtuar pengesat partiake në këtë proces.
“Presim vullnet politik dhe përgjegjësi institucionale, jo pengesa partiake”, theksoi Musliu-Shoshi.
Deputetja e PDK-së nënvizoi se për partinë e saj nuk është e rëndësishme vetëm që ligji të votohet, por edhe që ai të jetë juridikisht i qëndrueshëm dhe i zbatueshëm.
“Për ne nuk ka rëndësi vetëm votimi i ligjit, por që ai të jetë juridikisht i qëndrueshëm, i zbatueshëm dhe t’u shërbejë realisht çlirimtarëve tanë. UÇK-ja dhe mbrojtja e të drejtave të çlirimtarëve nuk duhet të bëhen peng i llogaritjeve politike”, tha ajo për “Front Online”.
Burimi: pressonline.al
