Ministri i Jashtëm rus, Sergej Lavrov, tha se thirrjet e Bashkimit Evropian për armëpushim në Ukrainë, të paraqitura me pretekste të ndryshme, synojnë zgjatjen e luftës.
“Kur dëgjojmë vajtime për krizën e Ukrainës, të cilën Brukseli e ka kthyer në një shaka brenda luftës së saj kundër vendit tonë, përfshirë thirrjet për një armëpushim të menjëhershëm ose për armëpushim energjetik, ushqimor, ajror apo detar, qëllimi nuk është sigurimi i paqes. E kemi parë këtë në shumë raste”, tha ai në seancën plenare të nivelit të lartë të Konferencës së 4-të Ndërkombëtare mbi Sigurinë Euroaziatike në Minsk.
Sipas Lavrovit, të gjitha këto kërkesa synojnë vetëm t’i japin Kievit një pauzë për të rivendosur aftësinë e tij luftarake, me ndihmën e sponsorëve të jashtëm të regjimit.
Duke folur për mënyrat e zgjidhjes së konfliktit në Ukrainë, diplomati i lartë rus theksoi se Moska këmbëngul jo për një armëpushim të përkohshëm, siç ka deklaruar vazhdimisht, por për trajtimin e qëllimshëm të shkaqeve themelore të krizës.
“Këto përfshijnë kërcënime strategjike ndaj sigurisë së Rusisë nga Perëndimi, shkelje të të drejtave të popullsisë ruse dhe rusishtfolëse të Ukrainës, siç garantohen nga Karta e OKB-së dhe Kushtetuta e Ukrainës, duke përfshirë territoret që aktualisht kontrollohen nga regjimi i Kievit, si dhe eliminimin e ideve dhe praktikave të nazizmit”, shtoi ai.
Burimi: euronews.al
