Mungesa e shumicës në komision
Mungesa e deputetëve të shumicës parlamentare ka penguar shqyrtimin e projektligjit për efiçiencën e energjisë dhe raportin për Autoritetin e Konkurrencës në Komisionin për Ekonomi, Industri, Ndërmarrësi, Tregti dhe Inovacion, sipas Ekonomia Online.
Kritikat e PDK-së ndaj shumicës
Lidhur me këtë, deputeti i PDK-së, Mergim Lushtaku, ka akuzuar Lëvizjen Vetëvendosje se po shmang debatin dhe po mbron, siç e quajti ai, persona që kanë shkelur rregullat në Autoritetin e Konkurrencës.
“Duket qartë që këta nuk kanë argumente për t’u përballur, por po zgjedhin një formë tjetër, jo vetëm bojkotin, por edhe mbrojtjen e personave që kanë vepruar keq në Autoritetin e Konkurrencës. Shihet qartë se ka konflikt interesash në këtë drejtim. E kemi parë në mbledhjen e kaluar, ku pati një tension nga anëtarët e VV-së për shtyrjen dhe kundërshtimin e anëtarëve të tjerë të bordit. Ky tension duhet shpjeguar, jo vetëm nga ne, por duhet kërkuar edhe hetim nga institucionet e drejtësisë”, u shpreh ai.
Deputeti i PDK-së tha se kërkojnë edhe ndihmën e qytetarëve për të sqaruar rastet e manipulimit të çmimeve dhe dëmtimit të konsumatorëve, siç pretendon ai.
Ai kritikoi gjithashtu atë që e quajti arrogancë të pushtetit, duke e akuzuar shumicën se po bojkoton punën e Komisionit për të mbrojtur bashkëpartiakët që drejtojnë këtë institucion.
“Kërkojmë publikisht ndihmën e qytetarëve në këtë proces, që mund të na ndihmojë të zbulojmë manipulimet e çmimeve dhe dëmtimin e qytetarëve. Është për t’u keqardhur mendësia e arrogancës së pushtetit dhe deri në çfarë shkalle ka arritur, deri te bojkotimi dhe mbrojtja e bashkëpartiakëve që drejtojnë këtë institucion. Ishte e qartë pamja e tyre, në këtë rast me mungesën e tyre. Kjo nuk do të mbarojë këtu. Do të kërkojmë shkarkimin e anëtarëve të bordit, dhe sigurisht do të kërkojmë ndihmën e qytetarëve për të nxjerrë në pah të vërtetën për ata që mbrojnë shkelësit e ligjeve dhe keqpërdoruesit e detyrës zyrtare”, deklaroi Lushtaku.
Qëndrimi i LDK-së për Autoritetin e Konkurrencës
Edhe deputetja e LDK-së, Janina Ymeri, tha se çështja e Autoritetit të Konkurrencës ka qenë aktive edhe në legjislaturën e kaluar, ndërsa shprehu kënaqësinë që, sipas saj, kësaj çështjeje po i kushtohet tani më shumë vëmendje.
Ymeri akuzoi deputetët e mazhorancës se po shmangin debatin dhe tha se mungesa e tyre po ndikon në mos-adresimin e veprimeve që ajo i konsideroi si jo-ligjore brenda Autoritetit.
“Çështja e Autoritetit të Konkurrencës ka qenë shumë aktive edhe në legjislaturën e kaluar, më vjen mirë që sot i vjen radha. Megjithatë, jam shumë e kënaqur që sot shihet se pushteti, anëtarët e mazhorancës në këtë rast, po shmangin përballjen. Kjo vlen për dy arsye: disa nga aktivitetet që janë kryer brenda Autoritetit, disa prej tyre ndër më të rëndësishmet, janë jo-ligjore, dhe mungesa e deputetëve të VV-së po e fal jo-ligjshmërinë dhe dhunën që është bërë në Autoritet. Dhuna nuk ndodh vetëm në baza gjinore. Po falen aktivitete jo-ligjore dhe kjo po ndodh në dëm të konsumatorëve. VV-ja ka bërë fushatë për konsumatorin, por në fakt punon me një plan që shkon në dëm të interesave të çdo konsumatori, nga produktet bazë deri te nafta dhe produktet e tjera”, deklaroi Ymeri.
Burimi: pressonline.al
