Deputetja e Partisë Demokratike të Kosovës, Ariana Musliu-Shoshi, ka ngritur shqetësime lidhur me mungesën e veprimeve institucionale për mbrojtjen e trashëgimisë së Ushtrisë Çlirimtare të Kosovës. Sipas saj, 44 ditë pas shpalljes së dënimit ndaj ish-pjesëtarëve të UÇK-së, institucionet shtetërore vazhdojnë të mos kenë një plan të qartë për të mbrojtur historinë dhe të vërtetën e luftës.
Në një reagim publik, Musliu-Shoshi theksoi se deri më tani nuk është hartuar asnjë strategji, asnjë platformë dhe asnjë parashikim buxhetor për këtë çështje.
Ajo vlerësoi se mbrojtja e historisë së UÇK-së nuk mund të arrihet vetëm me deklarata patriotike ose me grupe pune, por kërkon angazhim konkret institucional, veprim diplomatik dhe planifikim financiar.
“Historia e UÇK-së nuk mbrohet me deklarata patriotike, as me grupe pune në letër! Mbrohet me veprime, me diplomaci, me strategji dhe me buxhet!”, ka shkruar ajo.
Musliu-Shoshi kritikoi gjithashtu atë që e quajti braktisje institucionale të ish-pjesëtarëve të UÇK-së, duke theksuar se çdo ditë që kalon pa veprime konkrete e thellon më tej këtë situatë.
Burimi: pressonline.al
