Debati për reformën territoriale, i cili përfundoi me miratimin e saj me 85 vota nga socialistët, ishte vetëm një nga çështjet për të cilat qeveria ka refuzuar të hapë dialog me opozitën, deklaron Saimir Korreshi.
Saimir Korreshi dhe shqetësimi për reformën territoriale
Pikërisht reforma territoriale është edhe shqetësimi kryesor i demokratëve në lidhje me zgjedhjet vendore që do të mbahen më 9 maj 2027, thekson deputeti në një lidhje direkte me emisionin “Studio Live” në Report Tv. Sa i përket datës, e cila u caktua sot nga presidenti Bajram Begaj pasi opozita në bllok refuzoi ftesën, ai vlerëson se vendimi i socialistëve nuk përbën asgjë të re.
“Pse të merrnim pjesë? Taulanti e kishte paralajmëruar më herët datën 9, nuk ishte ndonjë gjë e re. Kjo është thjesht një lëvizje sa për të larë gojën. Nuk na shqetëson data, na shqetëson mënyra e reformës territoriale, kur ende nuk dihet se si do të funksionojnë këto bashki. Nuk e dimë si do të ecë procesi, çfarë elementësh ligjorë përmbajnë të gjitha këto dhe çfarë kompetencash do të marrin bashkitë e reja, ndërsa ne po shkojmë drejt zgjedhjeve më 9 maj. Pse kaq shpejtësi kur mungon kuadri ligjor?“, u shpreh Korreshi.
Për të tejkaluar situatën që krijon ndarja e re territoriale, deputeti i PD propozon një zgjidhje.
“Duhet të ketë një Kod Zgjedhor të ri, që as PD të mos ketë 51 vota dhe të mos arrihet në këtë model qeverisjeje”, thekson Korreshi.
Qëndrimi i PD-së për një bojkot të mundshëm
Një bojkot i mundshëm i zgjedhjeve nga PD, duke përsëritur gabimet e së shkuarës, nuk është opsion.
“Me statut, PD e ka të përcaktuar qartë që nuk bojkoton më zgjedhje. Nuk është diskutuar asnjëherë marrja ose jo pjesë”, deklaroi Korreshi.
Burimi: tirananews.al
