Nëntë burra po gjykohen për përdhunimin e një gruaje, e cila sipas akuzës ishte drogur nga bashkëshorti i saj për më shumë se 20 vjet.
Sipas CNN, nëntë burra u paraqitën para gjykatës në Mançester, në Angli, të akuzuar për përdhunim dhe abuzim seksual ndaj një gruaje. Ajo dyshohet se ishte drogur nga bashkëshorti i saj për më shumë se dy dekada, në mënyrë që të mos mund të reagonte apo të kundërshtonte.
Seanca e parë e gjyqit filloi të hënën. Prokuroria pretendon se të akuzuarit kishin krijuar kontakt me bashkëshortin e viktimës përmes grupeve në internet ose një faqeje për çifte që praktikonin shkëmbimin e partnerëve. Ata e kishin njohur atë pasi burri kishte shpërndarë në internet fotografi dhe video të abuzimit seksual ndaj gruas së tij.
Bashkëshorti i viktimës
Sipas prokurorëve, bashkëshorti, një burrë rreth të 60-ave nga Stockport, në veri të Anglisë, fillimisht shfrytëzonte momentet kur gruaja kishte konsumuar alkool në sasi të mjaftueshme për të rënë në gjumë të thellë.
Më vonë, ai filloi të përdorte një kombinim substancash narkotike për ta mbajtur atë pa ndjenja gjatë abuzimit.
Që nga viti 2023, ai filloi të ftonte burra të tjerë në banesën e tyre. Ndërsa bashkëshortja e tij qëndronte e pavetëdijshme në shtrat, ai filmonte veten dhe të tjerët duke e përdhunuar dhe abuzuar seksualisht, deklaruan prokurorët para gjykatës.
Bashkëshorti i viktimës, i cili nuk mund të identifikohet për të mbrojtur privatësinë e saj, pranoi në shtator fajësinë për disa vepra penale, përfshirë përdhunimin, sulmin seksual dhe administrimin e substancave me qëllim për ta droguar ose për ta bërë të paaftë për të reaguar. Ai ndodhet në paraburgim dhe do të dënohet në një datë të mëvonshme.
Ndërkohë, nëntë burrat që po gjykohen i mohojnë akuzat. Katër të bashkëpandehur të tjerë kanë pranuar tashmë fajësinë për vepra penale seksuale.
Zbulimi i rastit dhe hetimi
Rasti u zbulua pasi gazetarë investigativë, të infiltruar në një nga grupet në internet, identifikuan një përdorues që pretendonte se kishte drogur bashkëshorten e tij dhe ftonte persona të panjohur ta abuzonin seksualisht ndërsa ajo ishte pa ndjenja.
Pas identifikimit të tij, policia mori urdhër për kontrollin e banesës, ku sekuestroi disa sende, mes tyre edhe një telefon Samsung Galaxy. Sipas prokurorisë, në pajisje u gjetën më shumë se një milion fotografi dhe video që dokumentonin abuzimin.
Në gjykatë u bë e ditur se çifti kishte qenë në një lidhje prej 44 vitesh dhe kishte dy fëmijë së bashku. Gruaja deklaron se nuk i kishte takuar kurrë të pandehurit dhe nuk kishte pasur dijeni për kontaktet seksuale me ta.
Ajo mësoi për abuzimin vetëm në tetor 2025, kur policia mbërriti në banesën e tyre. Sipas prokurorëve, zbulimi i së vërtetës i dha fund jetës që ajo kishte njohur deri në atë moment.
Burimi: top-channel.tv
