Ministri i Financave, Petrit Malaj, prezantoi sot, më 2 nëntor, në Komisionin për Çështjet Ligjore projektbuxhetin për vitin 2027. Ky projekt parashikon, për herë të parë, shpenzime publike që kalojnë 10 miliardë euro.
Malaj theksoi se një nga prioritetet kryesore është mbështetja e pensionistëve, përmes dyfishimit të bonusit mujor nga 1 janari dhe indeksimit të pensioneve në muajin prill. Projektbuxheti parashikon gjithashtu mbi 2 miliardë euro investime publike, rritje të fondeve për arsimin, shëndetësinë, bujqësinë dhe mbrojtjen sociale, si dhe shtesa pagash për mbi 8,500 punonjës të Policisë.
Në paketën fiskale që shoqëron buxhetin, qeveria propozon rritjen e tatimit mbi dividendin nga 8 në 15 për qind dhe të TVSH-së standarde nga 20 në 21 për qind. Njëkohësisht, parashikohet një normë e reduktuar 6 për qind për 54 produkte të shportës bazë.
Një ndryshim tjetër është zhvendosja e taksës së qarkullimit nga karburantet te taksa vjetore e automjeteve. Sipas Malajt, buxheti synon të ruajë stabilitetin fiskal, të rrisë mirëqenien e qytetarëve dhe të mbështesë investimet dhe reformat në kuadër të integrimit evropian.
Fjala e Ministrit në Komisionin për Çështjet Ligjore dhe Administratën Publike:
Projektligji i Buxhetit 2027, që po paraqesim para jush, është hartuar mbi objektivat dhe angazhimet e Programit Buxhetor Afatmesëm 2027–2029. Ai përcakton drejtimet kryesore të politikës sonë buxhetore për vitin e ardhshëm.
Për herë të parë, shpenzimet publike të planifikuara kalojnë 10 miliardë euro. Kjo shifër, historike për madhësinë e buxhetit, paraqet edhe një përgjegjësi më të madhe për përdorimin efikas të këtyre burimeve, në shërbim të interesit të gjerë publik.
Projektbuxheti i vitit 2027 është hartuar për të mbështetur prioritetet strategjike të vendit, me fokus mirëqenien e qytetarëve, forcimin e shërbimeve publike, mbështetjen e sektorëve kyç dhe vazhdimin e investimeve për zhvillimin ekonomik.
Projektbuxheti ka 3 prioritete themelore, që përcaktojnë drejtimin e zhvillimit të vendit:
Mirëqenia sociale dhe mbështetja për qytetarët;
Stabiliteti fiskal dhe financat publike të qëndrueshme;
Investimet, reformat dhe integrimi në BE.
Treguesit makroekonomikë
Përpara se të vazhdoj me prezantimin e këtij dokumenti themelor, më lejoni të bëj një përmbledhje të shkurtër të treguesve makroekonomikë. Ata tregojnë fondamentet e forta të ekonomisë sonë, mbi të cilat u bazua hartimi i këtij projektligji.
Rritja ekonomike gjatë gjysmës së parë të vitit 2026 ishte 3.6% në terma vjetorë. Kjo rritje pasqyron progres pothuajse në të gjithë sektorët e ekonomisë. Ajo u gjenerua kryesisht nga kërkesa e brendshme, konsumi privat, investimet dhe ecuria e mirë e eksporteve të shërbimeve, veçanërisht turizmi, që vazhdon të jetë një nga motorët kryesorë të ekonomisë sonë.
Për vitin 2026 parashikohet një rritje reale prej 4.0%, në linjë me ecurinë e qëndrueshme të aktivitetit ekonomik dhe kontributin pozitiv të sektorëve kryesorë. Të njëjtin nivel parashikohet edhe për periudhën afatmesme 2027–2029.
Shkalla e papunësisë në tremujorin e dytë të vitit ishte 8.3%, ndërsa pjesëmarrja në forcën e punës u rrit më tej, duke arritur 76.3%. Këta tregues dëshmojnë se ekonomia krijon më shumë mundësi punësimi dhe bëhet gjithnjë e më tërheqëse për fuqinë punëtore.
Paga mesatare në nivel vendi arriti në 967 euro në tremujorin e dytë të këtij viti, ose 9.8% më e lartë se e njëjta periudhë e vitit 2025.
Inflacioni mesatar për janar–shtator llogaritet në 2.9%, brenda kufijve të përcaktuar nga Banka e Shqipërisë dhe ndjeshëm më i ulët se niveli mesatar në Ballkanin Perëndimor (4.1%).
Investimet e Huaja Direkte në gjysmën e parë të vitit 2026 u rritën me 50.8%, duke arritur vlerën 1.1 miliardë euro. IHD-të janë gjithnjë e më shumë të orientuara drejt sektorëve me vlerë të shtuar, duke nxitur rritjen ekonomike, punësimin dhe produktivitetin në vend.
Në tërësi, këto rezultate tregojnë se Shqipëria po ecën me ritme të qëndrueshme drejt forcimit të stabilitetit ekonomik dhe fiskal. Ato krijojnë një klimë më të favorshme për investime dhe e afrojnë ekonominë tonë me standardet e Bashkimit Evropian.
Financat publike mbeten shtylla kryesore e këtij stabiliteti, përmes menaxhimit të disiplinuar dhe uljes së vazhdueshme të borxhit publik. Në vitin 2025 u arrit një balancë primare pozitive prej 0.3% të PBB-së, ndërsa borxhi publik zbriti në 52.9% të PBB-së, niveli më i ulët që nga viti 2008.
Edhe në vitin 2027 do të vazhdojmë rrugën e konsolidimit fiskal, me një deficit prej vetëm 2.3% të PBB-së. Do të ruajmë një balancë primare neutrale dhe do ta ulim borxhin publik në 52.4% të PBB-së.
Qëndrueshmëria e ekonomisë shqiptare dhe aftësia e saj për t’u përballuar presioneve të jashtme u vlerësuan vetëm një muaj më parë edhe nga agjencia ndërkombëtare e vlerësimit Moody’s. Agjencia përmirësoi perspektivën e Shqipërisë në “pozitive” dhe konfirmoi vlerësimin “Ba3”. Ky vendim është një dëshmi e qartë e qëndrueshmërisë së politikave tona financiare, por edhe e besimit në rritje të investitorëve të huaj.
Sa i përket të ardhurave buxhetore për vitin 2027, ato parashikohen në masën 907.9 miliardë lekë (rreth 9.4 miliardë euro), ose 30.9% të PBB-së.
Të ardhurat nga tatimet, doganat dhe kontributet e sigurimeve shoqërore e shëndetësore për vitin 2027 janë projektuar mbi bazën e analizës së realizimit të pritshëm të vitit 2026, ecurisë historike të të ardhurave dhe parashikimeve makroekonomike. Janë marrë parasysh ndikimi i rritjes ekonomike, inflacioni, politikat e reja fiskale dhe buxhetore, efektet e politikave të mëparshme dhe të ardhurat shtesë të prit
Burimi: tirananews.al
