Lapaj shpërndan video me Ballën dhe Sallën
Dy ish-aleatët e dikurshëm, kryetari i partisë ‘Shqipëria Bëhet’, Adriatik Lapaj, dhe Avokati i Popullit, Endri Shabani, janë përfshirë sërish në një shkëmbim replikash nga distanca.
Akuzat e Lapajt ndaj Shabanit
Përmes video-mesazheve të publikuara në rrjetet sociale, Lapaj e quan Shabanin tradhtar. Sipas tij, Shabani ka lidhur pazare politike për të arritur postin e Avokatit të Popullit, duke e bërë këtë në dëm të qytetarëve që votuan kundër Edi Ramës.
Në një nga videot, Lapaj ka publikuar pamje nga një takim mes Shabanit, kryetarit të grupit parlamentar të PS-së, Taulant Ballës, dhe ministrit Andis Sallës. Sipas tij, ky takim tregon qartë pazaret e Avokatit të Popullit me votuesit e koalicionit ‘Nisma Shqipëria Bëhet’.
“Ligji zgjedhor shqiptar nuk lejon demokraci të plotë, dhe kundër kësaj po luftojmë. Listat e mbyllura përbëjnë 1/3, ndërsa listat e hapura 2/3. Për ta kapërcyer këtë problem, unë, me mirëbesim të plotë ndaj asaj që thoni, për të dhënë shembullin e demokracisë brenda partisë, nuk garova në listën e mbyllur dhe nuk e vura veten në pozicion të sigurt, që sot do të isha në Parlament. Garova në listën e hapur dhe kapërcova pengesën e sistemit. Pastaj sistemi bëri gjithçka, dhe me firmat e PD-së e bëri Avokat Populli atë që u bë tradhtar i një ideje të re, të demokratizimit.
Kur Edi Rama më kërkoi përfaqësuesit e tij për të më bindur dhe joshur të bëhesha pjesë dekorative e pushtetit të tij, kuptova se Endri Shabani kishte bërë pazar për të marrë postin e ministrit, në kurriz të votuesve që kundërshtuan Ramën. E refuzova dhe u sulmova. Sot koha po më jep të drejtë, sepse po dalin në dritë të vërtetat e këtij sistemi”, tha, ndër të tjera, Lapaj përmes video-mesazheve në rrjetet sociale.
Incidenti me Mevlan Matën
Shabani ka denoncuar gjithashtu një incident me aktivistin e partisë ‘Shqipëria Bëhet’, Mevlan Matën. Sipas tij, Mata ka shkuar pranë banesës së tij bashkë me një kameraman, e ka filmuar dhe fyer ndërsa ai po pinte kafe me prindërit.
“Dje kryetari i partisë ‘Shqipëria Bëhet’ më sulmoi sërish, siç ka bërë prej një viti, duke manipuluar një video ku përshëndesja dy deputetë. Si Avokat i Popullit raportoj çdo muaj në Kuvend dhe kam detyrim institucional të punoj me të gjithë deputetët, pa dallim partie. Edhe më parë, nuk kam besuar se kundërshtari duhet parë si armik, deri aty sa të mos i japësh dorën. Jam i bindur se edhe Adriatiku, që vetë del në video duke qeshur me të njëjtët deputetë, e di mirë këtë.
Sot Mevlan Mata, aktivist i së njëjtës parti, erdhi me kameraman poshtë pallatit ku banoj, për të më filmuar duke më fyer, ndërsa po pija kafe me prindërit e mi. E njoh Mevlanin që nga shkolla e mesme dhe më vjen keq që i duhet të japë shenja të tilla besnikërie ndaj partisë. Kritikën ndaj meje e pranoj, që nga momenti kur kam pranuar një detyrë publike. Por prindërit e mi të moshuar nuk e meritojnë të përfshihen në skena të tilla, sepse nuk janë pjesë e asnjë debati politik dhe nuk kanë asnjë përgjegjësi publike. Besoj fort se shtëpia dhe familja e çdo shqiptari duhet të mbeten të paprekura, prandaj ky kufi nuk duhet kapërcyer”, thuhet në reagimin e Endri Shabanit.
Burimi: shqiptarja.com
