Drejtuesit e PD-së nuk besojnë vërtet se çdo qytetar kundër Edi Ramës është mbështetës i Sali Berishës.
Ilir Vrenozi, militant i gjatë i Partisë Demokratike dhe një nga figurat më të njohura të Facebook-ut shqiptar, ka publikuar një video. Me një gjuhë direkte, pa u përpjekur të bëjë analiza politike, ai ngre një problem që drejtuesit e PD-së nuk duket se kanë dëshirë ta diskutojnë.
Vrenozi është i zemëruar. Zemërimi i tij nuk drejtohet kundër studentëve, as kundër Arlind Qorit, të cilin e përmend disa herë. Ai kritikon partinë e vet, e cila, në vend që të organizojë protestën e saj, po përpiqet të bëhet pjesë e protestës së studentëve. Dhe jo çdo proteste, por asaj ku dëgjohet thirrja: “Rama në burg, Berisha në burg!”.
Qëndrimi i PD-së ndaj protestës studentore
Ky qëndrim e bën situatën paradoksale. Partia Demokratike kërkon të bashkohet me njerëz që kërkojnë burgosjen e kryetarit të saj. Kur këta njerëz nuk e pranojnë, drejtuesit demokratë zemërohen. Sipas tyre, studentët kanë të drejtë të protestojnë kundër Edi Ramës, por duhet të kërkojnë leje nga Sali Berisha për mënyrën se si do ta bëjnë këtë.
Vrenozi, ndryshe nga shumë prej drejtuesve të partisë së tij, e sheh qartë këtë papajtueshmëri. Ai bën një pyetje të thjeshtë: pse Partia Demokratike, me deputetë, organizata, struktura dhe qindra mijëra votues, nuk organizon protestën e vet? Pse duhet të ndjekë studentët, të cilët nuk e kanë ftuar dhe të cilët, për më tepër, nuk e duan as në krye as në mes të tyre?
Në fakt, drejtuesit e PD-së nuk besojnë vërtet se çdo qytetar kundër Edi Ramës është mbështetës i Sali Berishës. Ata e dinë mirë se nuk janë më në gjendje të frymëzojnë askënd. Nuk kanë shpresë as për veten, e lëre më t’u japin shpresë qindra mijëra demokratëve që vazhdojnë të besojnë te partia e tyre.
Ndryshimi politik dhe interesat e drejtuesve
Grupi drejtues i PD-së, i mbledhur prej vitesh rreth Sali Berishës, duket se e trajton partinë si pronë të ideve dhe shpresave të demokratëve të thjeshtë. Njerëz si Ilir Vrenozi e kanë mbështetur Partinë Demokratike sepse kanë besuar se ajo mund ta ndryshonte Shqipërinë. Drejtuesit e tyre, megjithatë, duket se janë mësuar me një realitet tjetër, ku ndryshimi nuk është i domosdoshëm, për sa kohë ata vetë janë mirë.
Ata janë deputetë, kanë poste, ndikim dhe privilegje. Shumë prej tyre nuk kanë pse ankohen për marrëdhëniet me pushtetin dhe për favoret që sigurohen prej tij. Opozita e Sali Berishës nuk është më një mjet për të ndryshuar pushtetin, por një profesion që mund të ushtrohet deri në fund. Ndoshta disa presin me padurim të hapet ndonjë vend kryeinspektori, ku Edi Rama t’i emërojë edhe ata, si Dash Sula.
Rinia shqiptare nuk kërkon thjesht zëvendësimin e Edi Ramës. Ajo kërkon fundin e një klase politike që ka dominuar vendin për 35 vjet. Sali Berisha mund të shërbejë thjesht si epror në duart e Edi Ramës për t’i frikësuar votuesit, dhe asgjë më shumë.
Shpresa e gjithë atyre që mbështesin një ndryshim është që në PD të ketë sa më shumë njerëz si Ilir Vrenozi, që gux
Burimi: shqiptarja.com
