Ministri i Drejtësisë, Toni Gogu, paraqiti sot në Këshillin Kombëtar për të Drejtat dhe Mbrojtjen e Fëmijës katër masa që synojnë forcimin e garancive procedurale për të miturit që bien në kontakt me organet ligjzbatuese.
Masat e propozuara nga ministri Gogu
Propozimet janë:
- një formular të drejtash i hartuar në gjuhë të kuptueshme për fëmijët, i cili u dorëzohet atyre përpara marrjes në pyetje;
- avokat pa vonesë për të miturin që merret në pyetje, në përputhje me garancitë e parashikuara nga ligji;
- njoftim i hershëm i punonjësit të mbrojtjes së fëmijës;
- të dhëna të përbashkëta ndërinstitucionale mbi mënyrën e zbatimit të këtyre garancive.
Ministri i prezantoi këto masa si pjesë të qasjes së qeverisë ndaj dhunës së javëve të fundit: “Protesta paqësore mbrohet. Dhuna ka përgjegjësi. Në këtë përgjigje, Ministria e Drejtësisë mban një pjesë të veçantë: fëmijën.”
Strategjia për të Miturit dhe konsultimi publik
Gogu bëri të ditur se projekti i Strategjisë Ndërsektoriale të Drejtësisë për të Miturit 2027–2030, i përgatitur me asistencën teknike të UNICEF-it, ndodhet në konsultim publik deri më 22 nëntor. Ai propozoi që në këtë konsultim të dëgjohen edhe vetë fëmijët, rreth 20 nëntorit, Ditës së të Drejtave të Fëmijës.
Ministria po punon gjithashtu për transformimin e institutit për të miturit, drejt një modeli që forcon arsimin, rehabilitimin dhe rikthimin në familje. Së bashku me Ministrinë e Arsimit, Ministrinë e Brendshme dhe Ministrinë e Shëndetësisë dhe Mbrojtjes Sociale, po harton plane parandalimi në shkolla.
Ministri e lidhi këtë punë me qasjen e drejtësisë sociale që Ministria po nis: “Drejtësia duhet të arrijë te fëmija, edhe kur familja e tij nuk ka avokat, nuk ka lidhje, apo nuk di ku të trokasë.”
“Fëmija që ka gabuar duhet të dalë nga takimi me drejtësinë me shkollë, me profesion dhe me familjen pranë, jo me një dosje më shumë”, tha Gogu.
Burimi: shqiptarja.com
