PARIS, 2 nëntor /ATSH-AFP/ – Ministria e Arsimit njoftoi sot se numri i nxënësve që marrin pjesë në bllokimin e shkollave në Francë është ulur ndjeshëm, pas disa javësh protestash.
Sipas ministrisë, në të paktën tri të katërtat e zonave administrative të vendit nuk është raportuar asnjë pengesë për zhvillimin normal të mësimit.
Vetëm 1% e shkollave të mesme, gjithsej 41 institucione, u bllokuan ditën e parë pas pushimeve të ndërmjetme të semestrit.
Ky zhvillim nuk do të thotë, megjithatë, se protestat në Francë kanë mbaruar.
Për fundjavën janë njoftuar demonstrata të reja nga lëvizja e njohur si “Jelekët e Verdhë”.
Të enjten, Franca do të përballet edhe me një ditë grevash.
Gjatë kohës së fundit, grupe të tjera u janë bashkuar protestave të nxënësve dhe studentëve, ndër to edhe qytetarë që kundërshtojnë rritjen e kostos së jetesës.
Më 17 tetor, në margjinat e demonstratave të mëdha të para të përbashkëta, u shpërthyen trazira dhe pati plaçkitje dyqanesh, gjë që shkaktoi shqetësim në vend.
Pas këtyre ngjarjeve, qeveria ka filluar bisedime me nxënësit dhe studentët, duke premtuar fonde të reja për riparimin e shkollave të amortizuara dhe punësimin e më shumë mësuesve. //a.i/
Burimi: ata.gov.al
