Prej datës 1 nëntor 2026, në Zvicër fillojnë të zbatohen një sërë ndryshimesh ligjore dhe administrative që kanë të bëjnë me dokumentet e identitetit, sigurinë e fluturimeve, bashkëpunimin policor ndërkombëtar dhe bujqësinë.
Karta e re biometrike e identitetit
Një prej ndryshimeve kryesore ka të bëjë me përmirësimin e dokumenteve zvicerane të identitetit. Duke nisur nga e hëna, 2 nëntor, shtetasit zviceranë do të mund të bëjnë kërkesë për kartën e re biometrike të identitetit.
Ky dokument i ri do të ketë një çip elektronik që përmban fotografinë e fytyrës dhe dy gjurmë gishtërinjsh, çka ofron mbrojtje më të mirë ndaj falsifikimit dhe përdorimit të paligjshëm.
Sidoqoftë, qytetarët do të kenë ende mundësinë të zgjedhin mes kartës biometrike dhe asaj tradicionale pa çip.
Autoritetet zvicerane këshillojnë kartën biometrike për ata që udhëtojnë drejt vendeve të Bashkimit Evropian, ndërsa karta pa çip mbetet e përshtatshme për identifikim brenda Zvicrës.
Kartat e identitetit pa çip që ekzistojnë aktualisht do të mbeten të vlefshme deri në skadimin e afatit të tyre.
Një ndryshim tjetër ka të bëjë me pasaportat e përkohshme, të cilat nga 2 nëntori do të quhen zyrtarisht “pasaporta emergjente”. Përveç emrit, është përditësuar edhe pamja e dokumentit dhe elementet e sigurisë.
Ndryshimet nuk parashikojnë rritje të tarifave për kartat e identitetit dhe pasaportat emergjente.
Rregulla të reja për të dhënat e udhëtarëve ajrorë
Nga 1 nëntori hyn në fuqi edhe ligji i ri për përpunimin e të dhënave të pasagjerëve të transportit ajror.
Legjislacioni synon të forcojë luftën kundër terrorizmit dhe krimeve të rënda, duke mundësuar përdorimin e informacioneve të udhëtimit nga autoritetet kompetente.
Sipas rregullave të reja, kompanitë ajrore do të kenë detyrime për transmetimin e të dhënave të pasagjerëve në përputhje me kërkesat ligjore dhe standardet e mbrojtjes së të dhënave personale.
Megjithatë, zbatimi operacional do të nisë më 1 shkurt 2027, kur njësia e posaçme për përpunimin e këtyre të dhënave, në kuadër të Policisë Federale Zvicerane, do të fillojë punën.
Forcohet bashkëpunimi policor në kuadër të Schengenit
Ndryshime hyjnë në fuqi edhe në rregullat që lidhen me Sistemin Informativ të Schengenit (SIS).
Dispozitat e reja përcaktojnë më qartë mënyrën e administrimit dhe shkëmbimit të të dhënave personale ndërmjet autoriteteve zvicerane dhe vendeve të tjera pjesëmarrëse në sistem.
Qëllimi është përmirësimi i bashkëpunimit policor ndërkombëtar, forcimi i sigurisë së brendshme dhe rritja e efikasitetit të kontrolleve kufitare.
Ndryshime edhe në sektorin e bujqësisë
Nga sot zbatohen edhe rregulla të reja për kontrollin e diarresë virale të gjedhit (BVD), një sëmundje që prek bagëtinë.
Sipas sistemit të ri, fermat zvicerane do të klasifikohen vetëm në dy kategori, ato që janë të lira nga BVD dhe ato që nuk e kanë këtë status.
Fermat që plotësojnë kushtet për statusin pa BVD do të mund të lëvizin kafshët pa kufizime të lidhura me këtë sëmundje, ndërsa për fermat e tjera do të vazhdojnë të zbatohen masa kontrolli.
Autoritetet zvicerane kanë bërë të ditur se mbi 99 për qind e fermave të gjedhit në vend janë tashmë të lira nga kjo sëmundje.
Ndryshimet që hyjnë në fuqi më 1 nëntor janë pjesë e përpjekjeve të Zvicrës për modernizimin e shërbimeve publike, forcimin e sigurisë dhe përshtatjen e legjislacionit me zhvillimet teknologjike dhe standardet ndërkombëtare. /albinfo.ch
Burimi: insajderi.org
