Në prill 2025, ish-mbrojtësi i Barcelonës, Jeremy Mathieu, u bë viral në rrjetet sociale pasi ishte tërhequr nga futbolli dhe ishin shpërndarë fotografi të tij duke punuar në një dyqan artikujsh sportivë.
Karriera e Mathieu te Barcelona dhe Sporting
Mathieu, i cili u transferua te Barcelona nga Valencia në vitin 2014, luajti 91 ndeshje me fanellën e katalanasve dhe fitoi dy tituj të La Ligës, si dhe Ligën e Kampionëve, së bashku me yje si Lionel Messi, Xavi Hernandez dhe Andres Iniesta.
Francezi, i cili shënoi golin e fitores në një “El Clasico” kundër Real Madridit, më pas kaloi te gjiganti portugez Sporting CP, ku bëri mbi 100 paraqitje dhe fitoi tre trofe në Lisbonë.
Megjithatë, një lëndim i ligamentit të kryqëzuar anterior (ACL), që e pësoi gjatë një seance stërvitore në qershor 2020, i dha fund karrierës së tij më herët nga sa kishte planifikuar.
Disa vite më vonë, Mathieu u shfaq me uniformën e kompanisë “Intersport”, duke punuar në një dyqan në Cabries-Plan de Campagne, afër Aix-en-Provence.
Ai pozoi për një fotografi me dy tifozë të rinj brenda dyqanit, ndërsa imazhi u përhap me shpejtësi në rrjetet sociale.
Tifozët mbetën të habitur kur panë 42-vjeçarin duke punuar në këtë zinxhir artikujsh sportivë, por në atë kohë nuk u dha asnjë shpjegim se si kishte përfunduar në atë punë.
Arsyeja mbeti private deri në paraqitjen e tij në emisionin “Safe Play” të “BeIN Sports”, ku Mathieu tregoi gjithçka rreth ndryshimit të karrierës dhe punës së tij si shitës, duke sqaruar se vendimi nuk kishte të bënte me arsye financiare.
“Nëse jam duke punuar në ‘Intersport’, kjo ndodh sepse diçka po ndodh në jetën time që po më shkakton shumë probleme”, deklaroi ai.
“Mund të them vetëm se jam në mes të një procesi gjyqësor. Nuk do ta bëj këtë punë përgjithmonë. E bëra për të pasur një jetë sociale”, shtoi ai.
Problemet me shëndetin mendor dhe puna në Intersport
Mathieu kishte vuajtur nga depresioni pas përfundimit të karrierës si futbollist dhe kishte tentuar të luante edhe në nivelin amator, me skuadrën Luynes Sports në Regional 2.
Ishte Loic Loval-Landre, ish-bashkëlojtari i tij te Sochaux, ai që e ndihmoi të gjente punë në “Intersport”, pasi kishte vërejtur vështirësitë me të cilat po përballej dhe kishte kuptuar se Mathieu rrallëherë dilte nga shtëpia.
“Ai e dinte se dëshiroja të dilja pak nga shtëpia”, konfirmoi Mathieu.
“Për një kohë të gjatë nuk kisha bërë asgjë. Po bisedonim dhe ai më tregoi se ishte një vend i lirë pune”, bëri me dije ai.
Raportohet se gjatë kohës së tij te Barcelona, Mathieu fitonte rreth 100 mijë funte në javë, por nuk ka asnjë të dhënë se ai kishte humbur pasurinë e tij. Përkundrazi, ai e kishte pranuar punën për të gjetur sërish njëfarë lumturie në jetë.
Së fundmi, ish-mbrojtësi francez dha një tjetër intervistë për mediumin “So Foot”, ku foli hapur për problemet e tij me shëndetin mendor.
“Kam kaluar nëpër depresion, këtë nuk mund ta mohoj. Më mungonte fusha, dhoma e zhveshjes dhe gjithçka që kishim përjetuar. Për shkak të këtij lëndimi, nuk pata kohë të përgatitesha për jetën pas futbollit. Mendoja se do të luaja edhe dy vite të tjera, prandaj e kisha shumë të vështirë ta pranoja këtë situatë nga ana mendore. Fatmirësisht, bashkëshortja ime ishte aty për të më ndihmuar. Nuk e dija më se çfarë të bëja. Isha krejtësisht i humbur”, rrëfeu ai.
Mathieu tregoi gjithashtu se kishte momente kur “çohej nga divani, ecte nëpër shtëpi dhe vetëm psherëtinte”. Puna në “Intersport” e ndihmoi të dilte nga kjo periudhë e vështirë.
“Kjo punë më ndihmoi ta merrja veten, ta rindërtoja jetën sociale dhe, në fund të fundit, të filloja të jetoja përsëri. Edhe bashkëshortja ime nisi të merrej me disa punë të rastit dhe gjërat filluan të shkonin mirë. Më parë ishim bashkë gjatë gjithë kohës dhe kjo po bëhej gjithnjë e më e vështirë. Të punonim ndaras ishte mirë për të dy. Gjithashtu, u rilidha me miqtë e mi”, tha ai.
Mathieu tregoi se shoqëria me kolegët në dyqan i kujtonte atmosferën e dhomës së zhveshjes. Ai madje shpesh luante futboll me ta në depon e dyqanit, edhe pse kjo nuk lejohej.
Duke iu përgjigjur reagimeve negative pas publikimit të fotografisë së tij duke bërë një punë të zakonshme, ai tha: “Është diçka e ulët. Shumica e këtyre njerëzve qëndrojnë pas kompjuterëve të tyre. Ata nuk e njohin jetën time dhe nuk e dinë se çfarë kam kaluar. Ata shohin vetëm paratë, por kurrë anën njerëzore. Shumë prej tyre shkruanin se kisha mbetur pa para dhe se nuk kisha investuar asgjë. Edhe kur klientët më takonin në ‘Intersport’, disa më pyesnin: ‘Pse je këtu? Ke luajtur për Barcelonën, duhet të kesh shumë para!’. Por kjo nuk kishte të bënte fare me këtë”.
Fillimisht, ai punoi si shitës, përpara se të largohej për të marrë një rol në akademinë e Sochaux.
Megjithatë, pasi gjërat nuk shkuan siç kishte pritur, u rikthye në “Intersport”, këtë herë si ndihmës i përgjegjësit të sektorit të futbollit.
Mathieu, i cili është mik i ngushtë me Bruno Fernandesin që nga koha kur të dy ishin pjesë e Sportingut, aktualisht është duke ndjekur kurset për licencën e trajnerit dhe drejton ekipin U15 të Aix-en-Provence.
Synimi i tij është që, pasi të përfundojë kualifikimin, të punojë në një akademi futbolli dhe të vazhdojë karrierën në zhvillimin e futbollistëve të rinj./GazetaExpress/
Burimi: www.gazetaexpress.com
