A të ka ndodhur të shohësh dikë me një stil të veçantë dhe të mendosh: “Sa bukur i rrinë këto rroba!”? Ndoshta më pas ke menduar se një veshje e tillë nuk do të të shkonte kurrë ty. Në të vërtetë, edhe nëse do të kopjoje të njëjtin kombinim, rezultati mund të mos ishte i njëjtë. Kjo nuk do të thotë se nuk ke shije, por se ende nuk e ke gjetur plotësisht stilin tënd personal.
Ka një ndryshim mes të pëlqyerit të një veshjeje dhe të ndierit vetvetja kur e vesh. Shpesh, ajo që e bën një kombinim të duket kaq i bukur nuk janë vetëm rrobat, por mënyra si personi i përzgjedh dhe i kombinon ato. Nuk është thjesht një pulovër e kuqe, por nuanca, prerja dhe materiali i duhur.
Një arsye pse veshjet mund të mos funksionojnë është mbështetja e tepërt te prirjet e modës dhe fotografitë frymëzuese. Është mirë të marrësh ide nga të tjerët, por duhet t’i përshtatësh ato me personalitetin tënd. Edhe kur blen në internet, pyet veten nëse të pëlqen vërtet veshja apo thjesht duket bukur te modelja.
Ja gjashtë arsye që mund të të pengojnë të gjesh stilin tënd dhe çfarë mund të bësh për ta ndryshuar këtë.
1. Mbështetesh tepër te prirjet e modës
Një nga gabimet më të zakonshme gjatë blerjeve është të zgjedhësh diçka vetëm sepse është në modë. Qëllimi nuk është të dukesh si të gjithë të tjerët, por të gjesh veshje që të bëjnë të ndihesh rehat dhe autentike. Nëse një prirje përputhet me shijet e tua, provoje. Përndryshe, mos u ndiej e detyruar të blesh diçka vetëm sepse e veshin të gjithë.
2. Përpiqesh të kopjosh stilin e dikujt tjetër
Fotografitë në Pinterest dhe kombinimet e njerëzve me stil mund të jenë burim frymëzimi, por kopjimi i plotë nuk garanton të njëjtin rezultat. Në vend që të riprodhosh një veshje nga koka te këmbët, përqendrohu te pjesa që të tërheq më shumë dhe mendo si mund ta përshtatësh me gardërobën tënde. Provo prerje, ngjyra dhe materiale të ndryshme për të kuptuar se çfarë të shkon.
3. Nuk i njeh përmasat e tua të sakta
Edhe veshja më e bukur mund të humbasë hijeshinë kur nuk të rri mirë. Për shembull, pantallonat me këmbë të gjera mund të duken të mrekullueshme, por nëse janë shumë të shkurtra ose nuk kanë prerjen e duhur, mund të prishin gjithë kombinimin. Njohja e përmasave të trupit është veçanërisht e rëndësishme kur blen në internet, pasi të ndihmon të zgjedhësh veshje që të përshtaten më mirë.
4. Nuk e përfytyron veten me stilin që dëshiron
Përpara se të kërkosh frymëzim te veshjet e të tjerëve, provo të përfytyrosh veten në situatat ku dëshiron të ndihesh më e sigurt. Çfarë do të vishje në ato momente? Cilat ngjyra, prerje dhe kombinime të bëjnë të ndihesh më shumë vetvetja? Kjo mënyrë të menduari mund të të ndihmojë të kuptosh se cilat veshje përputhen me imazhin që dëshiron të përcjellësh.
5. Ke shumë veshje bazë dhe pak pjesë që të entuziazmojnë
Një gardërobë e mbushur me bluza të bardha dhe xhinse mund të jetë praktike, por jo domosdoshmërisht të pasqyrojë personalitetin tënd. Nëse ndien se veshjet e tua janë të mërzitshme, provo të shtosh pjesë më të veçanta që të tërheqin vërtet. Mund të jenë ngjyra të forta, motive kafshësh apo aksesorë që i japin karakter kombinimit. Nuk ke pse të heqësh dorë nga rehatia, por as të kufizohesh vetëm te zgjedhjet e sigurta.
6. Edhe veshjet bazë nuk janë përshtatur me ty
Edhe pjesët më të thjeshta të garderobës meritojnë vëmendje. Jo të gjitha bluzat e bardha kanë të njëjtën prerje apo material, ndaj rëndësi ka të gjesh atë që të rri më bukur. Një këmishë e zgjedhur mirë dhe një palë pantallona me prerje të përsosur mund të krijojnë një kombinim elegant pa pasur nevojë për shumë elemente të tjera. Ia vlen të investosh te veshjet që duken sikur janë bërë posaçërisht për ty.
Burimi: anabelmagazine.com
