Kush nuk do ta adhuronte Meryl Streep? Ajo mban rekordin si aktorja më e nominuar ndonjëherë për çmimin Oscar. Pas nominimit të saj të njëzetë, në vend të një deklarate për shtyp, ajo i kërkoi publicistit të saj të shpërndante një GIF ku shfaqej duke kërcyer. Fjalimi i saj i njohur në Golden Globes arriti të kritikonte Donald Trumpin pa e përmendur emrin e tij. E më pas vijnë interpretimet e saj të shquara në filma si Sophie’s Choice, Adaptation, Julie & Julia, The Devil Wears Prada dhe, sigurisht, Mamma Mia!.
Përveç talentit të saj të rrallë, Meryl Streep është kthyer në një zë frymëzues për gratë, për vetëbesimin, plakjen, guximin për të qenë vetja dhe rëndësinë e mosheqjes dorë nga ajo që besojmë. Më poshtë janë 19 nga thëniet e saj më frymëzuese.
Për plakjen dhe pranimin e vetvetes
“Kur ishe 48 vjeçe, të nxirrnin lopatën, gati për të të varrosur… Unë jam këtu në emër të të gjitha grave të moshuara dhe jam krenare që jam këtu.”
“Duhet ta përqafosh plakjen. Jeta është e çmuar dhe, kur ke humbur shumë njerëz, e kupton se çdo ditë është një dhuratë.”
Për këshillat më të mira të jetës
“Frika është diçka e mirë. Frika është miku yt. Gjithçka që të nxjerr nga ekuilibri mund të të ndihmojë.”
“Përfshije atë që beson në çdo fushë të jetës sate. Merre zemrën me vete në punë dhe kërko më të mirën nga vetja dhe nga të gjithë të tjerët.”
“Është mirë ta sfidosh veten dhe të bësh gjëra që nuk dëshiron domosdoshmërisht t’i bësh. Nëse nuk je automatikisht i mirë në diçka, provoje. Të provuarit është kaq e rëndësishme.”
Për famën
“Përpiqem të bëj një jetë sa më të zakonshme. Nuk mund të llastohesh nëse i hekuros vetë rrobat e tua.”
Për të mësuar ta duash veten
“Për të rinjtë, si djemtë ashtu edhe vajzat, ajo që ju bën të ndryshëm apo të çuditshëm është forca juaj. Dikur e urreja hundën time. Tani jo. Është në rregull.”
“Në momentin që fillon të shqetësohesh për atë që mendojnë të tjerët, është momenti kur pushon së qeni vetvetja.”
“Liria e vërtetë është të kuptosh se kemi zgjedhje se kujt dhe çfarë i lejojmë të ketë pushtet mbi ne.”
Për vetëbesimin dhe vlerën personale
“Kur isha e re, nuk kisha aspak besim në bukurinë time. E shihja veten si një aktore karakteresh, dhe ende e shoh veten kështu.”
“Këshilla ime është kjo: mos shpenzoni kaq shumë kohë duke u shqetësuar për lëkurën apo peshën tuaj. Zhvilloni atë që bëni, atë që krijoni dhe atë që i ofroni botës me duart tuaja.”
“Mendoj se gjëja më çliruese që bëra në fillim të karrierës ishte të çlirohesha nga çdo shqetësim për pamjen time, për aq sa ajo lidhej me punën time.”
Për lumturinë
“Formula e lumturisë dhe suksesit është thjesht të jesh vetvetja, në mënyrën më të gjallë dhe më të plotë që mundesh.”
Për politikën dhe barazinë
“Mungesa e respektit sjell mungesë respekti. Dhuna nxit dhunën. Kur njerëzit e pushtetshëm e përdorin pozitën e tyre për të poshtëruar të tjerët, humbasim të gjithë.”
“Ekziston seksizmi në botë. Më zemëron mungesa e përfshirjes së grave në vendimmarrje në çdo institucion të botës. Pse njerëzit që marrin këto vendime nuk janë gjysma gra? Kjo më duket e gabuar.”
Për modelin e saj më të madh të frymëzimit
“Mentorja ime ishte nëna ime, Mary Streep. Ajo hynte në një dhomë dhe e ndriçonte atë, ndërsa njerëzit trishtoheshin kur ajo largohej. Për mua, kjo është ajo që ka vërtet rëndësi: te kush lë gjurmë dhe si e prek jetën e tij.”
“Mendoj se modelet më të mira për gratë janë njerëzit që janë plotësisht vetvetja, me besim dhe dinjitet, dhe që sjellin dritë në botë.”
Për ta bërë zërin tënd të dëgjohet
“Është e mahnitshme se sa shumë mund të arrish nëse kërkon atë që dëshiron me qetësi, qartësi dhe autoritet.”
“Gratë janë më të mira në aktrim sesa burrat. Pse? Sepse duhet të jenë. Nëse aftësia për ta bindur dikë më të fuqishëm se ti për diçka që ai nuk dëshiron ta dijë është një aftësi mbijetese, atëherë kështu kanë mbijetuar gratë ndër mijëvjeçarë.”/KultPlus.com
Burimi: kultplus.com
