Presidenti i Shteteve të Bashkuara, Donald Trump, ka thënë se mund të përdorë veton presidenciale nëse Partia Republikane humbet kontrollin e Kongresit në zgjedhjet e mesmandatit, të cilat do të mbahen më 3 nëntor.
‘’Ndoshta do të jem Z. Veto”, u shpreh Trump në një intervistë ekskluzive për Fox News, duke theksuar se mund të refuzojë ligjet që një Kongres me shumicë demokrate do t’i dërgonte për miratim.
Fushata para zgjedhjeve
Trump ka zhvilluar fushatë pa pushim në shumë pjesë të vendit, përfshirë zona që më parë konsideroheshin baza të sigurta për republikanët.
Gjatë fundjavës, ai e promovoi programin e partisë së tij në tubime në Kansas, Florida dhe Iowa, si dhe në takime virtuale me kandidatë në Michigan, Ohio dhe Pensilvani.
Në zgjedhjet e mëparshme, Trump i fitoi lehtësisht Floridën, Iowa-n dhe Kansasin, shtete që dikur konsideroheshin të besueshme për republikanët. Vizitat e tij të fundit në këto shtete treguan se ato janë bërë konkurruese në përcaktimin e kontrollit të Kongresit.
Trump u tha mbështetësve se ka ndryshuar vendin. Sipas tij, demokratët e kishin çuar SHBA-në në një “epokë të errët”, ndërsa nën drejtimin e tij, “e kemi kthyer shpejt në epokën e artë të Amerikës”.
Kostoja e jetesës dhe mesazhi i fushatës
Trump po përballet me kritika të forta për koston e jetesës. Çmimet janë rritur, sidomos për karburantin, ushqimet dhe kujdesin shëndetësor, që nga fillimi i luftës në Iran, më shumë se tetë muaj më parë. Në këto tubime, ai dukej se kishte dy synime: të largonte bisedën nga këto çështje dhe të përdorte frikën për të mobilizuar votuesit republikanë.
Në prag të zgjedhjeve, Trump dhe administrata e tij kanë hedhur vazhdimisht dyshime mbi besueshmërinë dhe sigurinë e votimit, pavarësisht provave që tregojnë se mashtrimi me votat është i rrallë. Departamenti i Drejtësisë ka nisur hetime ose ka kërkuar që votat të lihen mënjanë në disa shtete të SHBA-së.
Rreziqet janë të larta për Trumpin, pasi rezultatet e zgjedhjeve të mesmandatit shihen si një matës se sa të kënaqur janë amerikanët me performancën e presidentit.
Burimi: shqiptarja.com
