Presidenti amerikan, Donald Trump, ka thënë se lufta kundër Iranit mund të marrë fund “shumë shpejt, në një mënyrë apo në një tjetër”, duke i shtuar presion Teheranit për të arritur një marrëveshje me Uashingtonin.
“Ose do të bëjnë një marrëveshje, ose thjesht do ta përfundojmë ne”, deklaroi Trump, duke lënë hapur mundësinë që konflikti të mbyllet përmes negociatave ose me veprime ushtarake.
Ndërkohë, tensionet në rajon vazhdojnë të rriten. Korpusi i Gardës Revolucionare Islamike të Iranit (IRGC) njoftoi se dy cisterna që transportonin naftë të papërpunuar u përfshinë nga flakët pasi goditën mina në Ngushticën e Hormuzit.
Në të njëjtën kohë, vendet e Gjirit dënuan sulmin e së premtes ndaj një anijeje që transportonte gaz natyror të lëngshëm (LNG) të Katarit.
Nga ana tjetër, ministri iranian i Jashtëm, Abbas Araghchi, tha se bisedimet me ndërmjetësuesit për një plan dyditor, që synon rihapjen e Ngushticës së Hormuzit, vazhdojnë akoma.
Araghchi shprehu shpresën që Shtetet e Bashkuara do të zgjedhin rrugën diplomatike, duke theksuar se Uashingtoni duhet të ketë “arsye të mjaftueshme për të zgjedhur diplomacinë”.
Burimi: euronews.al
