Tetë dekada formimi artistik dhe kontributi në kulturën shqiptare u përkujtuan me një koncert jubilar, ku muzika simfonike ishte pjesë e festimit të 80-vjetorit të Liceut Artistik “Jordan Misja”. Me këtë rast, Orkestra Simfonike e Radio Televizionit Shqiptar paraqiti në skenë një program që bashkoi veprat e kompozitorëve botërorë me ato shqiptare.
Programi i koncertit
Koncertin e drejtoi dirigjenti Gridi Kraja, ndërsa soliste ishte Jonela Golemi. Programi u hap me uverturën e operës “Dasma e Figaros” të Wolfgang Amadeus Mozartit, pastaj u vazhdua me “Meditim” të F. Dedës dhe vepra të Ludwig van Beethovenit.
Më pas, Jonela Golemi interpretoi “Csárdás” të kompozitorit Vittorio Monti, ndërsa koncerti u mbyll me “Serenat për harqe” të Pjotr Iliç Çajkovskit. Repertori i këtij përvjetori përfshiu periudha dhe gjuhë të ndryshme muzikore.
Liceu Artistik “Jordan Misja”
I themeluar në vitin 1946, Liceu Artistik “Jordan Misja” është një nga institucionet më të rëndësishme të formimit artistik në Shqipëri. Gjatë tetë dekadave, shkolla ka edukuar breza artistësh në muzikë, arte pamore, teatër dhe koreografi, duke ndikuar në zhvillimin e jetës artistike dhe kulturore të vendit.
Përvjetori përkujton historinë e institucionit dhe brezat që kanë kaluar nëpër të, por edhe vazhdimësinë e një tradite artistike që mbështetet te formimi dhe kultivimi i talenteve të reja./KultPlus.com
Burimi: kultplus.com
