Nuk është pjesëtar i forcave ushtarake, por mban emrin e një prej misioneve ndërkombëtare më të njohura në Kosovë. Kfor Gashi ka ardhur në jetë në qershor të vitit 1999, vetëm katër ditë përpara se trupat e KFOR-it të hynin në Kosovë më 12 qershor 1999. Aktualisht ai është 27 vjeç. Historia e emrit të tij është po aq e veçantë sa vetë emri.
Historia e emrit Kfor Gashi
Në një rrëfim të dhënë më parë, Gashi kishte treguar se kishte lindur gjatë luftës, ndërsa disa ditë më pas familja po ndiqte lajmet për hyrjen e trupave të KFOR-it në Kosovë.
Sipas tij, familjarët kishin parë ushtarët e KFOR-it dhe helikopterët në televizion, kur njëri prej tyre propozoi që foshnjës t’i vendosej pikërisht emri KFOR.
“Unë kam lindur në Kosovë në kohën e luftës, disa ditë para se të hyjë në Kosovë KFOR-i. Në momentin e hyrjes familja ka qenë duke i shikuar lajmet. Aty i kanë parë ushtarët e KFOR-it me helikopterë dhe daja i babës ka thënë: po ia lëmë emrin KFOR”, kishte rrëfyer ai.
Kfor Gashi ka jetuar në Kosovë deri rreth moshës dy vjeç e gjysmë.
Më pas, familja e tij është zhvendosur në Gjermani, ku ai ka vazhduar jetën pranë familjes në zonën e Eggenfeldenit, afër Mynihut.
Reagimet ndaj emrit të tij
Emri i tij vazhdon të tërheqë vëmendjen sa herë që prezantohet para njerëzve që nuk e kanë dëgjuar më parë.
Ai kishte treguar se reagimi më i zakonshëm është habia.
“Kur u tregoj se si e kam emrin, të gjithë ndalen dhe më pyesin: ‘Wow, çfarë emri interesant. Kush ta ka lënë emrin? E kujt ishte ideja?'”, kishte treguar Gashi.
Sipas tij, në Gjermani jo të gjithë e njohin menjëherë domethënien e emrit, ndërsa ata që kanë njohuri për historinë e Kosovës dhe misionin e NATO-s e kuptojnë më shpejt lidhjen.
Trupat e KFOR-it hynë në Kosovë më 12 qershor 1999, pas përfundimit të fushatës ajrore të NATO-s kundër forcave jugosllave.
Fushata e bombardimeve kishte nisur më 24 mars 1999 dhe zgjati 78 ditë.
Pikërisht në ato ditë historike lindi Kfor Gashi, emri i të cilit mbeti si një kujtim personal i një prej momenteve më të rëndësishme të historisë moderne të Kosovës./ Paparaci/ KultPlus.com
Burimi: kultplus.com
