Takimi i Albulena Haxhiu me Afrim Gashi
Albulena Haxhiu, kryetarja e Kuvendit të Kosovës, e nisi vizitën e saj zyrtare në Maqedoninë e Veriut me një takim me homologun Afrim Gashi.
Gjatë këtij takimi, Haxhiu bëri me dije se bashkë me Gashin biseduan për thellimin e lidhjeve mes Kosovës dhe Maqedonisë së Veriut, duke u përqendruar veçanërisht te forcimi i bashkëpunimit ndërparlamentar dhe te kontributi i kuvendeve në përmirësimin e marrëdhënieve dypalëshe.
Haxhiu vuri në dukje rëndësinë e një mbështetjeje të gjerë parlamentare për marrëdhëniet mes dy shteteve, duke çmuar se bashkëpunimi duhet të përfshijë si shumicën parlamentare, ashtu edhe opozitën.
Bashkëpunimi ndërparlamentar dhe roli i kuvendeve
Në këtë kontekst, palët diskutuan për mundësitë e zgjerimit të bashkëpunimit nëpërmjet komisioneve parlamentare dhe grupeve të miqësisë, si dhe për rolin e kuvendeve në mbikëqyrjen e zbatimit të marrëveshjeve mes dy vendeve.
“Me Kryetarin Gashi biseduam për forcimin e bashkëpunimit ndërparlamentar përmes komisioneve dhe grupeve të miqësisë. U ndalëm edhe te roli i kuvendeve në mbikëqyrjen e zbatimit të marrëveshjeve ndërmjet dy vendeve, në mënyrë që bashkëpunimi ynë të sjellë përfitime konkrete për qytetarët”.
“E falënderova për mbështetjen që Maqedonia e Veriut i jep Kosovës në organizatat ndërkombëtare. Biseduam edhe për bashkërendimin e përpjekjeve tona në forumet parlamentare ndërkombëtare dhe për rrugën evropiane të dy vendeve”, ka shkruar ajo.
Burimi: pressonline.al
