Gjatë një operacioni që zgjati dy ditë, policia ka vënë në pranga 13 persona, të moshave nga 18 deri në 46 vjeç, në Shkup, Prilep, Demir Kapi, Bogovinë dhe Shtip. Gjatë kontrolleve të kryera, autoritetet kanë sekuestruar marihuanë, substancë të bardhë në formë pluhuri dhe kokrrizash, tableta, si dhe objekte që përmbanin material pluhur.
Arrestime në Shkup dhe Prilep
Në Shkup janë ndaluar nëntë persona, të cilëve u është gjetur marihuanë dhe lëndë të dyshuara narkotike. Ndërkohë, në burgun e Prilepit, gjatë kontrollit të një të burgosuri 32-vjeçar, janë zbuluar lëndë pluhuri, disa tableta me ngjyra të ndryshme dhe objekte me përmbajtje pluhuri.
Në të njëjtën ditë, rreth orës 21:00, në fshatin Bogovinë, efektivët e Stacionit Policor në Kamjan kanë arrestuar një 44-vjeçar nga fshati Pirok. Gjatë kontrollit të tij është gjetur dhe sekuestruar marihuanë, ndërsa ai është mbajtur në ambientet e stacionit policor.
Raste në Demir Kapi dhe Shtip
Në Demir Kapi është ndaluar një 29-vjeçar nga fshati Koreshnicë, të cilit i janë gjetur një lëndë e bardhë pluhur dhe një tabletë. Sipas MPB-së, një rast tjetër është evidentuar në Shtip, ku një 26-vjeçar nga Shkupi është konstatuar duke konsumuar marihuanë.
Ministria e Punëve të Brendshme bëri të ditur se, pasi të përfundojë dokumentimi i rasteve, ndaj personave të arrestuar do të ngrihen kallëzimet përkatëse.
Burimi: www.albeu.com
