Më 31 tetor 1918, në Vjenë, u nda nga jeta piktori austriak Egon Schiele, një nga emrat më me peshë të ekspresionizmit dhe artit modern vjenez. Ai vdiq në moshën 28-vjeçare, si pasojë e gripit spanjoll.
Fillimet artistike të Egon Schiele
I lindur më 12 qershor 1890 në Tulln të Austrisë, Schiele shfaqi prirje për vizatim që në fëmijëri. Në moshën 16-vjeçare u pranua në Akademinë e Arteve të Bukura në Vjenë, por pas dy vjetësh e la akademinë dhe, bashkë me disa artistë të tjerë, themeloi grupin “Neukunstgruppe”.
Një ndikim të rëndësishëm në rrugën e tij artistike pati piktori Gustav Klimt, i cili u bë mentori dhe mbështetësi i tij. Me kalimin e viteve, Schiele krijoi një stil të veçantë, të karakterizuar nga portretet ekspresive, figurat njerëzore me forma të theksuara dhe trajtimi i temave si trupi, identiteti, dashuria dhe vdekja.
Trashëgimia dhe fundi i jetës
Megjithë jetën e shkurtër, ai la pas një krijimtari të rëndësishme dhe u bë një nga figurat kryesore të artit modern austriak, përkrah Gustav Klimt dhe Oskar Kokoschka.
Në vitin 1918, Schiele humbi bashkëshorten e tij, Edith, e cila vdiq nga gripi spanjoll më 28 tetor. Vetëm tri ditë më pas, më 31 tetor, edhe ai ndërroi jetë nga e njëjta sëmundje./KultPlus.com
Burimi: kultplus.com
