Matthew Perry shpenzoi rreth 7 milionë dollarë gjatë jetës së tij në përpjekje për të fituar betejën me varësinë nga alkooli dhe droga. Aktori i njohur për rolin e Chandler Bing në serialin legjendar “Friends” kaloi dekada të tëra mes trajtimeve, shtrimeve në spital dhe përpjekjeve të vazhdueshme për të qëndruar i pastër.
Detaje të dhimbshme nga jeta e tij janë zbuluar në dokumentarin me tre episode “The One About Matthew Perry”, i publikuar në Netflix më 27 tetor 2026. Në të, motra e aktorit, Mia Perry Bowick, dhe miqtë e tij rrëfejnë për betejën e gjatë që Perry zhvilloi larg syve të publikut.
Sipas motrës së tij, në periudhat më të vështira aktori merrte deri në 55 pilula Vicodin në ditë, ndërsa shuma që kishte shpenzuar gjatë viteve për t’u çliruar nga varësia arrinte në rreth 7 milionë dollarë.
Fillimi i problemeve me substancat
Problemet me substancat nuk nisën pas famës në Hollywood. Perry kishte treguar në librin e tij autobiografik “Friends, Lovers, and the Big Terrible Thing”, botuar në vitin 2022, se kishte provuar alkoolin për herë të parë në moshën 14-vjeçare. Në moshën 18-vjeçare, ai tashmë konsumonte alkool çdo ditë.
Një tjetër moment që ndikoi në përkeqësimin e situatës ishte viti 1997, gjatë xhirimeve të filmit “Fools Rush In”, ku luante përkrah Salma Hayek. Pas një aksidenti me një motoçikletë uji, aktori pësoi një dëmtim dhe iu përshkrua një qetësues kundër dhimbjeve. Perry kishte rrëfyer se pilula e parë i kishte dhënë një ndjesi euforie, duke e shtyrë të kërkonte gjithnjë e më shumë.
Varësia u kthye shpejt në një rreth vicioz, ku periudhat pa ilaçe shoqëroheshin me simptoma të tërheqjes, duke e bërë edhe më të vështirë shkëputjen prej tyre.
Motra e tij zbulon se e kishte kuptuar përmasën e problemit kur ishte vetëm 16 vjeçe, pasi kishte lexuar një artikull në gazetë për vështirësitë e Matthew me substancat. Në fillim kishte menduar se lajmi nuk ishte i vërtetë, derisa prindërit i treguan se i vëllai kishte nisur trajtimin.
Perry iu nënshtrua rehabilitimit për herë të parë përmes një programi 28-ditor. Megjithatë, kthimi në xhirimet e sezonit të katërt të “Friends” nuk shënoi fundin e problemeve. Vitet në vijim u karakterizuan nga rikthime të vazhdueshme në varësi dhe përpjekje të reja për të nisur nga e para.
Problemet shëndetësore dhe vitet e fundit
Një nga momentet më dramatike të jetës së tij ishte viti 2018, kur pësoi një çarje të zorrës së trashë, të cilën më vonë e lidhi me abuzimin me opioidet. Aktori qëndroi dy javë në koma dhe kaloi pesë muaj në spital. Për nëntë muajt pasues iu desh të jetonte me një qese kolostomie. Mjekët u kishin thënë familjarëve se shanset e tij për të mbijetuar ishin vetëm 2%.
Edhe rikthimi i shumëpritur i kastit të “Friends” në vitin 2021, përmes një episodi special, nuk ishte një periudhë e lehtë për të. Ndonëse u ribashkua me Jennifer Aniston, Courteney Cox, Lisa Kudrow, Matt LeBlanc dhe David Schwimmer, Perry vazhdonte të përballej me problemet e tij shëndetësore dhe varësinë.
Motra e tij kujton se pas përfundimit të xhirimeve, aktori dukej i rraskapitur dhe i shqetësuar për të ardhmen. Ajo rrëfen se në atë periudhë nisi të kishte frikë se sëmundja e të vëllait mund të mos mposhtej kurrë.
“E dija që ishte shumë i frikësuar dhe se po luftonte me të gjitha forcat. Por e dija gjithashtu se një pjesë e tij nuk besonte se do të arrinte të qëndronte i pastër. Nuk isha dorëzuar, por kisha filluar të mendoja se sëmundja e tij ishte terminale”, tregon ajo.
Matthew Perry u nda nga jeta më 28 tetor 2023, në moshën 54-vjeçare. Vdekja e tij u lidh me efektet akute të ketaminës, duke rikthyer vëmendjen te pasojat shkatërruese të varësisë.
Përtej suksesit të jashtëzakonshëm si Chandler Bing, dokumentari sjell në vëmendje historinë e një njeriu që, pavarësisht famës dhe mundësive financiare, kaloi pjesën më të madhe të jetës duke kërkuar një mënyrë për të fituar betejën me veten.
Burimi: bordo.al
