Halloween-i është rasti kur edhe personazhet më të njohura publike mund të transformohen aq shumë, sa të jetë vështirë të dallohen. Gjatë viteve, shumë yje kanë befasuar me kostume të jashtëzakonshme, duke përdorur grim special, proteza dhe efekte vizuale për t’u shndërruar në personazhe krejtësisht të ndryshme.
Heidi Klum dhe festa e saj tradicionale
Një nga emrat më të njohur për transformimet e Halloween-it është modelja Heidi Klum, e cila prej vitesh organizon një nga festat më të famshme të kësaj dite. Në vitin 2026, ajo shënon 25-vjetorin e festës së saj tradicionale dhe ka paralajmëruar se këtë herë do të sjellë një kostum më të guximshëm se kurrë, me më shumë elemente të frikshme.
Por Klum nuk është e vetmja që ka mahnitur me paraqitjet e saj. Në mesin e 13 kostumeve më të paharrueshme ndër vite janë transformime që kanë bërë bujë në publik dhe rrjetet sociale.
Transformimet e yjeve nga viti 2014 deri në 2021
Në vitin 2014, aktori Colton Haynes u shndërrua në princeshën Fiona nga filmi i animuar “Shrek”, me ngjyrë të gjelbër në të gjithë trupin dhe proteza që e bënë pothuajse të panjohur. Një vit më vonë, Heidi Klum u paraqit si Jessica Rabbit, personazhi i njohur nga filmi “Who Framed Roger Rabbit”, pas një procesi transformimi që zgjati rreth dhjetë orë.
Në vitin 2017, basketbollisti LeBron James zgjodhi të vishej si Pennywise, kllouni i frikshëm nga filmi “It”, ndërsa këngëtari Jason Derulo u shndërrua në Night King nga seriali “Game of Thrones” dhe madje performoi me këtë kostum në një festë në Los Angeles.
Në vitin 2018, Heidi Klum dhe partneri i saj i atëhershëm, Tom Kaulitz, u paraqitën si Shrek dhe Fiona, duke mbërritur në festë me një karrocë në formë qepe. Në të njëjtën mbrëmje, aktorja Kat Graham u shndërrua në personazhin e Jim Carrey-t nga filmi “The Mask”, ndërsa çifti The Weeknd dhe Bella Hadid rikrijoi personazhet kryesore të filmit “Beetlejuice”.
Një vit më vonë, Neil Patrick Harris dhe David Burtka surprizuan me kostume të përbashkëta, duke u shndërruar në motrat binjake Mary-Kate dhe Ashley Olsen. Ndërsa në vitin 2021, këngëtarja Lizzo zgjodhi personazhin Grogu, i njohur si Baby Yoda, nga seriali “The Mandalorian”.
Kostumet e viteve të fundit
Heidi Klum vazhdoi të sfidonte kufijtë e transformimit edhe në vitet pasuese. Në vitin 2022, ajo u paraqit si një krimb gjigant, me një kostum të realizuar përmes protezave dhe efekteve speciale. Për këtë transformim, modelja tha se ideja kishte kërkuar dy vjet punë.
Në vitin 2023, ajo zgjodhi të shndërrohej në një pallua gjigant, me ndihmën e disa performuesve që qëndronin pas saj dhe formonin pendët e zogut. Bashkëshorti i saj, Tom Kaulitz, u paraqit si një vezë.
Në vitin 2024, çifti u transformua në versione mashkullore dhe femërore të alienit E.T., nga filmi i famshëm i Steven Spielbergut i vitit 1982. Ndërsa në vitin 2025, Klum u shfaq si Meduza, me gjarpërinj lëvizës në vend të flokëve dhe një bisht të gjatë, ndërsa Kaulitz u vesh si një ushtar grek i kthyer në gur.
Këto paraqitje dëshmojnë se për disa yje, Halloween-i është shumë më tepër se një festë me kostume: është një mundësi për të eksperimentuar me identitetin, kreativitetin dhe transformimet që vështirë se do të mund të realizoheshin në ndonjë rast tjetër./KultPlus.com
Burimi: kultplus.com
