Autoritetet greke kanë hapur një procedim penal kundër 59 personave, të cilët dyshohen se janë anëtarë të një rrjeti të gjerë kriminal. Ky rrjet dyshohet se ka ndërtuar një skemë mashtrimi fiskal me vlerë rreth 100 milionë euro, duke përdorur si mbulesë një zinxhir furrash buke dhe pastiçerish në Greqi, sipas raportimit të agjencisë greke të lajmeve ANA.
Ndër të dyshuarit figuron edhe pronari i rrjetit “Horiatiko”.
Ata akuzohen, mes të tjerash, për pjesëmarrje në organizatë kriminale, mashtrim, evazion fiskal, falsifikim dokumentesh dhe pastrim parash.
Disa prej tyre përballen edhe me akuzat për trafikim seksual, vjedhje me dhunë, mashtrim dhe mospagim të kontributeve të sigurimeve shoqërore.
Roli i furrave të bukës në skemë
Sipas hetuesve të cituar nga televizioni publik ERT, furrat e bukës dyshohet se shërbenin për të deklaruar artificialisht të ardhura dhe për të lëshuar fatura shitjeje, me qëllim pastrimin e parave të përfituara nga veprimtari të tjera.
Mes personave të ndaluar ka edhe kontabilistë dhe një ish-sindikalist.
Pronari dhe aktivitetet e tij
Pronari, i cili sipas raportimeve ishte dënuar edhe më parë, zotëronte gjithashtu disa klube nate dhe restorante në Athinë e rrethinat e saj, si dhe në ishujt turistikë Mykonos, Rodos dhe Zakinthos.
“Horiatiko” është një zinxhir grek furrash buke dhe pastiçerish me dhjetëra pika shitjeje, veçanërisht në Atikë, rajonin që përfshin Athinën.
Burimi: lajmifundit.al
