Të paktën 21 persona kanë humbur jetën dhe mbi 40 të tjerë janë plagosur si pasojë e një sulmi me dron në një treg të qytetit Nyala, i cili është kryeqendra e shtetit Darfur i Jugut në Sudan.
Sulmi në tregun Tangooj
Sipas dëshmitarëve të cilësuar nga AFP, sulmi ka goditur tregun Tangooj rreth orës 20:00 të mbrëmjes së djeshme.
Ky treg frekuentohej edhe nga persona të armatosur, në veçanti nga luftëtarë të Forcave të Mbështetjes së Shpejtë (RSF), grup paramilitar që ushtron kontrollin mbi zonën.
Numri i viktimave është konfirmuar nga një punonjës i shëndetësisë në spitalin e Nyala-s, i cili ka bërë me dije se 21 persona kanë ndërruar jetë dhe më shumë se 40 të tjerë kanë mbetur të plagosur.
Intensifikimi i konfliktit në Sudan
Ky sulm vjen në një periudhë kur ushtria sudaneze po shton goditjet ndaj pozicioneve të RSF-së, ndërkohë që konflikti i armatosur në këtë shtet afrikan vazhdon të shkaktojë viktima dhe zhvendosje të popullsisë.
Burimi: abcnews.al
