Komisioni Evropian ka prezantuar një udhëzues të ri për përgatitjen e qytetarëve në rast emergjencash dhe krizash, duke rekomanduar që çdo familje të jetë në gjendje të përballojë nevojat bazë për të paktën 72 orët e para.
Nisma u prezantua më 3 nëntor, në Forumin Evropian të Mbrojtjes Civile, nga komisionerja për Barazi, Gatishmëri dhe Menaxhim të Krizave, Hadja Lahbib.
Udhëzuesi vjen në një kohë kur Evropa po përballet me kriza dhe kërcënime gjithnjë e më komplekse, ndërsa synon të rrisë aftësinë e qytetarëve dhe institucioneve për t’u përballur me situata të jashtëzakonshme.
Katër fushat kryesore të dokumentit
Dokumenti përqendrohet në katër fusha kryesore: vetëpërgatitjen për 72 orët e para të emergjencës, edukimin për gatishmërinë që në moshë të hershme, përfshirjen e personave me aftësi të kufizuara dhe informimin e qytetarëve për rreziqet dhe kërcënimet.
Në kuadër të kësaj nisme, qytetarët nxiten të kenë në dispozicion furnizimet bazë dhe një çantë emergjence, në mënyrë që të mund të përballojnë nevojat jetike derisa të mobilizohet ndihma publike.
Edukimi dhe Dita e Përgatitjes
Një tjetër element i rëndësishëm është edukimi. Komisioni Evropian kërkon që përgatitja ndaj emergjencave të integrohet në programet shkollore, ndërsa mësuesit të trajnohen për t’u mësuar fëmijëve si të reagojnë në situata të ndryshme krize.
Paralelisht, Komisioni ka propozuar krijimin e një “Dite të Përgatitjes së BE-së”, e cila do të organizohet çdo vit më 23 tetor, duke nisur nga viti 2027.
Kjo datë përkon me përvjetorin e krijimit të Mekanizmit të Mbrojtjes Civile të Bashkimit Evropian, të themeluar në vitin 2001.
Nisma synon të ndërgjegjësojë qytetarët dhe komunitetet për rëndësinë e përgatitjes, si dhe të vlerësojë punën e autoriteteve dhe organizatave që angazhohen në mbrojtjen civile.
Vazhdimësia e strukturave kombëtare
Gjithashtu, Komisioni Evropian po ndërmerr hapa për të garantuar vazhdimësinë e funksionimit të strukturave kombëtare të mbrojtjes civile edhe në rastet kur vendet përballen me fatkeqësi apo situata që ndërpresin funksionimin normal të institucioneve.
Burimi: abcnews.al
