Bashkimi Evropian ka filluar shqyrtimin teknik të Kapitullit 7, i cili ka të bëjë me të drejtat e pronësisë intelektuale, në kontekstin e bisedimeve për anëtarësimin e Shqipërisë.
Sidoqoftë, nuk është caktuar ende një afat për zhvillimin e konferencës së radhës ndërqeveritare, ku mund të merret vendimi për mbylljen e një kapitulli tjetër, sipas informacioneve që ka siguruar Albanian Post.
Shqyrtimi në Grupin e Punës COELA
Kjo çështje është përfshirë në punimet e Grupit të Punës për Zgjerimin dhe Vendet që Negociojnë Anëtarësimin në BE (COELA), i cili mbajti mbledhjen e tij të radhës të enjten, më 29 tetor, në Bruksel.
Sipas një burimi nga BE-ja, diskutimi në këtë fazë është ende paraprak dhe përfshin prezantimin e Komisionit Evropian, pasuar nga pyetje dhe sqarime nga shtetet anëtare.
“Është ende herët për të diskutuar për afate”, deklaroi zyrtari evropian për Albanian Post, duke sqaruar se nuk mund të ketë asnjë planifikim orientues për konferencën e ardhshme ndërqeveritare pa përparim të mëtejshëm gjatë ditëve dhe javëve në vijim.
Në dokumentacionin e Këshillit të BE-së, të datës 27 tetor, gjendet projekti i qëndrimit të përbashkët për Kapitullin 7, i cili është pjesë e Grupkapitullit 2, që përfshin tregun e brendshëm.
Shqyrtimi i këtij dokumenti në nivel teknik përbën një hap përgatitor dhe nuk do të thotë se shtetet anëtare kanë marrë tashmë vendimin për mbylljen e kapitullit.
Qëndrimi i Këshillit përballë protestave
Protestat nuk kanë ndryshuar deri tani qëndrimin e Këshillit
Në një periudhë kur Shqipëria po përballet me protesta dhe tensione të brendshme politike, burimi evropian bëri të ditur se, nga këndvështrimi i Këshillit të BE-së dhe presidencës së tij, nuk ka deri tani një ndryshim të qëndrimit për ecurinë e negociatave.
Burimi: tirananews.al
