Elisa Spiropali dhe Plarent Ndreca nuk do të jenë më pjesë e forumeve drejtuese të Partisë Socialiste, por do të vazhdojnë të mbeten anëtarë të partisë. Këtë e ka bërë të qartë sekretari i përgjithshëm i PS-së, Blendi Klosi, përmes një sqarimi të ri për mediat.
Vendimi dhe sqarimi i sekretarit
Edhe pse në përfundim të mbledhjes së Asamblesë Kombëtare nuk u zhvillua votim për përjashtimin e tyre, Klosi ka konfirmuar se të dy nuk mund të jenë më pjesë e asnjë forumi të PS-së.
“Keqkuptimi padyshim i qëllimshëm i prononcimit tim pas Asamblesë ka prodhuar një lajm të rremë. Po, Elisa Spiropali dhe Plarent Ndreca nuk mund të jenë më pjesë e asnjë forumi të re partie. Por në një parti si PS, ku cilido aplikon online dhe bëhet anëtar, nuk ka sens përjashtimi edhe nga partia. Fakti që nuk u votua në asamble është shumë i thjeshtë. Tre shokë që ishin kundër parimisht për përjashtimin u shprehën lirisht dhe në mbyllje gjithçka ishte e qartë. Ky është fakti, ndërsa të tjerat janë konsum mediash që mund ta mbulojnë diellin me shoshë vetëm tani që u bë natë. Nesër është një ditë e re dhe Partia Socialiste do të vazhdojë rrugën me frymën pozitive të kësaj asambleje”, shkruan Klosi.
Reagimet e mëparshme dhe qartësimi
Fillimisht, sekretari i përgjithshëm deklaroi se Elisa Spiropali vijonte të ishte anëtare e Partisë Socialiste, duke krijuar paqartësi lidhur me kërkesën e kryeministrit Edi Rama për largimin e saj dhe të Plarent Ndrecës.
Në reagimin e dytë, Klosi sqaroi se vendimi lidhet me largimin nga forumet e partisë dhe jo me përjashtimin nga anëtarësia.
Burimi: euronews.al
