TIRANË, 14 nëntor/ATSH/ Zëvendëskryeministrja Albana Koçiu shprehu sot mirënjohjen për kryetarin e Partisë Socialiste, Edi Rama, për besimin e dhënë për të qenë bashkëkryetare e PS-së në Tiranë, së bashku me ministrin e Brendshëm, Ervin Demo.
Në një reagim pas Asamblesë Kombëtare të Partisë Socialiste, Koçiu theksoi se angazhimi i përbashkët do të vijojë në çdo lagje dhe njësi administrative të kryeqytetit.
Angazhimi për integrimin europian
Ajo nënvizoi se puna do të përqendrohet në përmbushjen e objektivave për integrimin europian të Shqipërisë, si dhe në realizimin e angazhimeve ndaj qytetarëve për shërbime më cilësore dhe rezultate konkrete.
“Bashkë me Ervinin, Ogertën dhe çdo socialist të Tiranës, do të vijojmë punën në çdo lagje e në çdo njësi”, u shpreh Koçiu.
Tirana dhe objektivi “Shqipëria 2030”
Ajo theksoi se Tirana, si kryeqytet europian, duhet të jetë shembull i zhvillimit dhe krijimit të mundësive të reja për familjet, duke e cilësuar atë si pikënisjen e fitores së Partisë Socialiste drejt objektivit “Shqipëria 2030”.
/gj.m/r.e/
Burimi: ata.gov.al
