Një bashkëpunim i veçantë erdhi këtë gusht në muzikën shqiptare, duke bashkuar në të njëjtin projekt një artiste reale dhe një personazh të krijuar nga Inteligjenca Artificiale.
Evi Reçi dhe Bora Faira
Në qendër të projektit “Nata Sonte” janë Evi Reçi dhe Bora Faira, personazhi virtual i krijuar përmes Inteligjencës Artificiale, e cila më herët tërhoqi vëmendjen me projektin “Jam e Lirë”.
Këtë herë, Bora Faira rikthehet me një koncept edhe më ambicioz, ku teknologjia ndërthuret drejtpërdrejt me një artiste reale. Sipas prezantimit të projektit, për herë të parë në Shqipëri publiku do të shohë një videoklip ku xhirimet reale ndërthuren me pamje të krijuara nga Inteligjenca Artificiale, duke sjellë një eksperiencë vizuale ndryshe nga klipet tradicionale.
Për këtë eksperiment është zgjedhur Evi Reçi, e cila sjell zërin, prezencën skenike dhe eksperiencën e saj në muzikë dhe media, përballë botës virtuale të Bora Fairës.
Bashkimi mes tyre krijon pikërisht kontrastin mbi të cilin është ndërtuar projekti: njeriu përballë virtuales, por këtë herë jo si konkurrentë, por si bashkëpunëtorë.
Produksioni i TIVQ
“Nata Sonte” është një produksion i TIVQ, që synon të eksperimentojë me mënyrën se si Inteligjenca Artificiale mund të përdoret në krijimtarinë muzikore dhe vizuale, jo për të zëvendësuar artistin, por për të zgjeruar mundësitë krijuese.
Projekti synon kështu të hapë një kapitull të ri eksperimental në tregun shqiptar, në një kohë kur Inteligjenca Artificiale po fiton gjithnjë e më shumë hapësirë në industrinë ndërkombëtare të muzikës.
Burimi: bordo.al
