Presidenti amerikan Donald Trump ka shprehur sërish mbështetjen për kandidatin Bruce Blakeman në garën për postin e guvernatorit të shtetit të New York dhe u bëri thirrje qytetarëve të votojnë për të.
Përmes një postimi, Trump e cilësoi Blakeman si një patriot që mbështet politikën “America First”. Sipas presidentit amerikan, Blakeman ka qenë në krah të tij që në fillimet e lëvizjes politike dhe ka bashkëpunuar ngushtë me agjentët e emigracionit (ICE), Patrullën Kufitare dhe forcat e rendit për forcimin e sigurisë dhe garantimin e rendit publik.
Prioritetet e kandidatit
Presidenti amerikan renditi edhe prioritetet që Blakeman do të ndjek nëse zgjidhet guvernator, mes të cilave janë rritja ekonomike, ulja e taksave dhe rregulloreve, nxitja e prodhimit vendas.
Kritika ndaj kundërshtares
Trump nuk i kurseu kritikat ndaj kundërshtares së Blakeman, guvernatores aktuale Kathy Hochul, të cilën e cilësoi si përfaqësuese të së majtës radikale.
Ai thekson se Hochul mbështet rritjen e taksave, kufijtë e hapur, politikat për personat transgjinorë, e të tjera. “Kathy Hochul është e papërgjegjshme, radikale dhe e rrezikshme!”, shkroi Trump.
Mesazhi i plotë i Trump
Donald Trump: Është një nder i madh për mua të shpreh mbështetjen për patriotin e lëvizjes “America First”, Bruce Blakeman, i cili kandidon për t’u bërë guvernatori i ardhshëm i shtetit të madh të Nju Jorkut!
Bruce, drejtuesi shumë i respektuar dhe mjaft popullor i Qarkut Nassau, është plotësisht në linjë me lëvizjen MAGA dhe ka qenë në krahun tim që në fillim.
Në detyrën e drejtuesit të Qarkut Nassau, ai po punon pa u lodhur së bashku me heronjtë trima të ICE, Patrullës Kufitare dhe forcave të rendit, për të mbajtur kufijtë tanë të sigurt, për të ndaluar krimet e kryera nga emigrantët, për të mbrojtur komunitetin dhe për të garantuar LIGJIN DHE RENDIN.
Kundërshtarja e tij, Kathy Hochul, është një demokrate e së majtës radikale, e cila kërkon rritje masive të taksave, kufij të hapur, pjesëmarrjen e burrave në sportet e grave dhe gjymtimin e fëmijëve tuaj në emër të tranzicionit gjinor. Kathy Hochul është e papërgjegjshme, radikale dhe e rrezikshme!
Nga ana tjetër, si guvernatori juaj i ardhshëm, Bruce do të vazhdojë të luftojë fort për rritjen e ekonomisë, uljen e taksave dhe të rregulloreve, promovimin e produkteve “Made in the U.S.A.”, dominimin energjetik amerikan, forcimin e ushtrisë dhe mbështetjen e veteranëve, avancimin e integritetit të zgjedhjeve dhe mbrojtjen e Amendamentit të Dytë të Kushtetutës, i cili është vazhdimisht nën sulm.
Bruce Blakeman ka mbështetjen time të plotë dhe të pakushtëzuar për t’u bërë guvernatori i ardhshëm i shtetit të madh të Nju Jorkut.
DILNI DHE VOTONI PËR BRUCE – AI NUK DO T’JU ZHGËNJË KURRË!
Presidenti DONALD J. TRUMP
Burimi: gazetashqiptare.al
