Struga u bë sërish pikëtakim i artit dhe kulturës shqiptare, përmes edicionit të 13-të të festivalit “K’tu Fest”, i cili këtë vit nderoi me çmimin kryesor aktorin e njohur shqiptar, Ndriçim Xhepa.
Një prej figurave më të rëndësishme të teatrit dhe kinematografisë shqiptare, Xhepa u vlerësua për kontributin e tij të jashtëzakonshëm në artin skenik dhe atë filmik.
Çmimi iu nda me motivacionin: “Për kontributin e tij të jashtëzakonshëm në artin e skenës dhe të kinemasë, duke sjellë dimensione të reja në mjeshtërinë e aktorit”.
Kujtimi i nënës, Margarita Xhepa
Ceremonia mori një ngarkesë të veçantë emocionale kur aktori kujtoi nënën e tij, aktoren e madhe Margarita Xhepa, Artiste e Popullit, e cila kishte një lidhje të veçantë shpirtërore dhe artistike me Teatrin Poshka dhe festivalin “K’tu Fest”.
Margarita Xhepa ishte ndër artistet që mbështetën dhe shoqëruan rrugëtimin e këtij festivali, duke lënë gjurmë të rëndësishme në historinë e tij.
Mirënjohje për organizatorët dhe Komunën
Me këtë rast, Ndriçim Xhepa shprehu mirënjohjen për organizatorët, regjisorët Olsa dhe Xhelo Poshka, të cilët për 13 vjet kanë punuar për ta kthyer Strugën në një pikëtakim të rëndësishëm të artistëve shqiptarë.
Çmimi iu dorëzua nga kryetari i Komunës së Strugës, Mendi Qyra, i cili ka mbështetur vazhdimisht Teatrin Poshka dhe aktivitetet e tij kulturore.
Traditë e vlerësimit të personaliteteve
Festivali “K’tu Fest” vazhdon traditën e vlerësimit të personaliteteve që kanë dhënë kontribut të veçantë në artin dhe kulturën shqiptare. Në edicionin e kaluar, çmimi iu nda gazetares Dijana Toska, e njohur edhe si organizatore e koncertit në Vatikan kushtuar Nënë Terezës.
Pas 13 edicionesh, “K’tu Fest” është shndërruar në një urë kulturore që bashkon artistë, breza dhe qytete, duke forcuar identitetin artistik të Strugës dhe rolin e saj në jetën kulturore shqiptare./KultPlus.com
Burimi: kultplus.com
