Një robot humanoid u përpoq të sfidonte kushtet ekstreme të Antarktidës, duke marrë pjesë në një garë maratonë mes akullit dhe temperaturave që arrinin deri në -24 gradë Celsius. Por eksperimenti teknologjik nuk shkoi sipas parashikimeve, pasi roboti u detyrua të tërhiqej pas vetëm tre kilometrash, sepse i mbaroi bateria.
Një garë në kushte ekstreme
Roboti, i quajtur Qestr, mori pjesë të dielën në garën Antarctic Ice Ultra, një aktivitet që zhvillohet në një nga mjediset më të vështira në planet. Ai u rreshtua në vijën e nisjes bashkë me 24 vrapues të tjerë, duke u përballur me temperatura polare dhe me terrenin e mbuluar nga bora dhe akulli. Edhe pse ishte pajisur me një xhaketë të posaçme termike për t’u mbrojtur nga i ftohti ekstrem, kjo nuk mjaftoi për ta ndihmuar të përfundonte garën. Pas përshkimit të rreth tre kilometrave, bateria e robotit u shkarkua plotësisht, duke i dhënë fund përpjekjes së tij.
Pamjet dhe reagimi i organizatorëve
Pamjet që po qarkullojnë në rrjetet sociale tregojnë robotin humanoid duke lëvizur nëpër sipërfaqen e mbuluar me dëborë, i veshur me pajisjet mbrojtëse, ndërsa përpiqet të përballojë kushtet e vështira atmosferike. Sipas organizatorit Oliver Wang, kjo ishte hera e parë që një robot humanoid merrte pjesë në këtë aktivitet, duke e kthyer garën në një provë të pazakontë për teknologjinë moderne.
Ndryshe nga Qestr, atletët njerëzorë vazhduan garën, ku pjesëmarrësit përshkojnë distanca deri në 160 kilometra. Një sfidë ku, të paktën për momentin, qëndrueshmëria njerëzore doli më e fortë se teknologjia.
Burimi: pressonline.al
