Në Maliq është organizuar aktiviteti i radhës nga Autoriteti për Informimin mbi Dokumentet e ish-Sigurimit të Shtetit, në kuadër të platformës edukative “Mësojmë nga e Kaluara”. Përmes një diskutimi rreth filmit “Vitet e para”, prodhim i vitit 1965, dhe dokumenteve arkivore, u rikthye në vëmendje historia e tharjes së Kënetës së Maliqit, si dhe përndjekja e inxhinierëve dhe e të burgosurve politikë në kampin e Vloçishtit.
Ndikimi i filmave dhe letërsisë komuniste në kujtesën kolektive
Diskutimi u fokusua te mënyra se si filmat dhe letërsia e periudhës komuniste ndikuan në kujtesën kolektive, duke i paraqitur si armiq të regjimit persona që ishin dënuar për arsye politike.
“Është një platformë e Autoritetit për Informimin mbi Dokumentet e ish-Sigurimit të Shtetit, që synon të sjellë një narrativë të rishkruar dhe fakte që na tregojnë pjesën e munguar të diktaturës komuniste, atë që ndoshta ende nuk është e qartë në kurrikula dhe në shkolla, as për brezin e ri dhe as për mësuesit e rinj”, u shpreh Rovena Rozhani, Specialiste e edukimit qytetar.
Përmes dokumenteve arkivore dhe dëshmive familjare, pjesëmarrësit sollën fakte mbi këtë periudhë dhe pasojat e përndjekjes te individët dhe familjet e tyre.
Fakte dhe dëshmi përballë propagandës së realizmit socialist
“Nuk duhet të ngatërrojmë rolin artistik që kanë luajtur aktorët tanë me skenarët e filmave të realizmit socialist, të cilët, në të shumtën e rasteve, janë mbushur me propagandë. Këtë propagandë duhet ta ballafaqojmë me faktet, provat dhe dëshmitë që kemi”, tha Skënder Vrioni, Anëtar i AIDSSH.
Aktiviteti synon të nxisë mendimin kritik te të rinjtë dhe njohjen e së kaluarës përmes dokumenteve dhe burimeve historike.
Gazetare: Eftjola Fili
/rtsh.al/
Burimi: rtsh.al
