Saranda ishte nikoqire e festivalit “Lira Ilira”, ku piktore, poetë dhe krijues nga Shqipëria e Rumania u mblodhën së bashku për të ndarë përvoja dhe për të përcjellë mesazhe përmes artit dhe letërsisë.
Festivali Ndërkombëtar i Arteve “Lira Ilira” u organizua në ambientet e Bashkisë së Sarandës.
Përfaqësues të të dy vendeve, Shqipërisë dhe Rumanisë, diskutuan mbi rëndësinë e bashkëpunimit kulturor, mbrojtjen e trashëgimisë dhe kontributin e artit në afrimin e njerëzve.
Fjala e përfaqësueses së shoqatës “Epoka e Bardhë”
Sink Ferasete Dauti, përfaqësuese e shoqatës “Epoka e Bardhë”, u shpreh:
“Jemi këtu bashkë me miqtë tanë nga Rumania, të cilët dëshirojnë që përmes këtij aktiviteti kultura, trashëgimia dhe fjala të kalojnë përtej kufijve. Saranda gjithmonë ka qenë mikpritëse ndaj kulturës dhe trashëgimisë kulturore. Këtu kemi Butrintin, këngët, vallet, poezinë dhe shumë krijues që kanë dhënë kontributin e tyre”, u shpreh Dauti.
Pavarësisht dallimeve kulturore, arti mbetet një gjuhë e përbashkët që bashkon njerëzit.
“Mund të jemi njerëz me kultura të ndryshme, por në fund të gjithë jemi në gjendje të përcjellim vlera dhe mesazhe. Fjala mund të udhëtojë përtej kufijve nëse njerëzit e duan vërtet këtë. Asgjë nuk mund ta ndalojë”, tha ajo.
Festivali, që u mbajt nga 23 deri më 25 tetor, përfshiu fusha të ndryshme të krijimtarisë artistike, si poezia, muzika, piktura dhe kërcimi.
Burimi: shqiptarja.com
