Pesë fuqitë kryesore evropiane të NATO-s kanë si qëllim të përforcojnë mbrojtjen e Ukrainës para se të mbërrijë dimri i ardhshëm, duke i furnizuar atij sisteme të mbrojtjes ajrore dhe pajisje të tjera ushtarake.
Paketat e ndihmës për dimrin
“Kemi përgatitur paketa ndihme për dimrin, si pjesë e mbështetjes sonë për Ukrainën”, u shpreh ministri gjerman i Mbrojtjes, Boris Pistorius, pas takimit me homologët e tij nga Franca, Polonia, Britania e Madhe dhe Italia.
“Gjithashtu do të bëjmë çdo gjë të mundshme që Shtetet e Bashkuara të vazhdojnë ta mbështesin Ukrainën me furnizime, sidomos me informacione të inteligjencës dhe të dhëna satelitore”, shtoi ai.
Këto pesë vende, të njohura si grupi E5, po bashkëpunojnë gjithashtu me Ukrainën për ndërtimin e një sistemi të mbrojtjes ajrore.
“Synimi është të mbrojmë ukrainasit nga sulmet ajrore, përveç sistemeve “Patriot” dhe sistemeve të tjera”, deklaroi Pistorius.
Ai akuzoi presidentin rus, Vladimir Putin, se po ushtron terror ndaj popullsisë civile.
Rritja e ndihmës evropiane
Radmila Sekerinska, zëvendëssekretare e përgjithshme e NATO-s, e cila mori pjesë në takimin ministror të grupit E5, tha se diskutimet u përqendruan te rritja e ndihmës evropiane për Ukrainën në disa fusha, përfshirë burimet financiare, pajisjet dhe furnizimet ushtarake.
Ajo theksoi se prioritet mbetet sigurimi i dërgimit të vazhdueshëm të sistemeve të mbrojtjes ajrore dhe pajisjeve të tjera jetike për Ukrainën, përmes kanaleve të ndryshme të furnizimit.
Sipas Sekerinska, kërcënimi ndaj Ukrainës po rritet me afrimin e dimrit. Për këtë arsye, aleatëve u është kërkuar të shtojnë ndihmën, veçanërisht në fushën e mbrojtjes ajrore dhe kundër raketave.
Ajo nënvizoi se aleatët duhet të veprojnë menjëherë, pasi presioni nga sulmet ruse ndihet çdo natë në pothuajse çdo qytet të Ukrainës.
Burimi: www.balkanweb.com
