Aston Martin ka prezantuar Valhalla Spider, versionin me çati të hapur të supermakinës hibride me motor të vendosur në mes, e cila u lançua në fillim të këtij viti. Edhe pse çatia është e hapur, modeli arrin shpejtësinë maksimale prej 349 km/h dhe prodhon 1,064 kuaj fuqi.
Publiku do ta shohë makinën për herë të parë këtë fundjavë, gjatë eventit Concours at Wynn në Las Vegas. Prodhuesi britanik synon t’i nisë dorëzimet në tremujorin e tretë të vitit 2027, ndërsa çmimi i saj nuk është bërë ende publik.
Motori dhe performanca
Nën kapak gjendet motori V8 me 4.0 litra dhe dy turbo, i kombinuar me tri njësi elektrike. Ky konfigurim gjeneron 1,064 kuaj fuqi dhe 1,100 Nm çift rrotullues, të cilat shpërndahen në të katër rrotat, raporton Telegrafi.
Valhalla Spider mban të njëjtën shpejtësi maksimale prej 349 km/h si versioni Coupé. Për të siguruar qëndrueshmëri gjatë lëvizjes së shpejtë, Aston Martin ka aplikuar aerodinamikë aktive dhe sisteme të posaçme drejtimi, të zhvilluara edhe për përdorim në pistë.
Zgjedhja e çatisë bëhet mes një mbulese prej pëlhure, e cila hiqet, dhe një versioni opsional të fortë të prodhuar nga fibra karboni. Me mbulesën prej pëlhure të montuar, automjeti nuk mund të kalojë 200 km/h, ndërsa çatia prej fibrash karboni mundëson arritjen e shpejtësisë prej 349 km/h.
Për të reduktuar turbulencat brenda kabinës gjatë drejtimit pa çati, automjeti përdor një deflektor të çmontueshëm. Ky element mund të paloset dhe të ruhet në hapësirat e posaçme brenda makinës kur nuk përdoret.
Prodhuesi ka rregulluar edhe disa pjesë të aerodinamikës dhe të sistemeve të stabilitetit, në mënyrë që ato t’u përshtaten ndryshimeve mes drejtimit me çati dhe atij pa çati.
Dizajni dhe pajisjet
Spider bëhet kështu supermakina e parë e prodhimit e Aston Martin me motor në mes dhe kabinë të hapur. Ajo mbështetet në të njëjtën strukturë prej fibrash karboni si Coupé, e cila ul peshën dhe ofron ngurtësinë e nevojshme për një automjet me performancë të lartë.
Modeli ka ruajtur edhe dyert e veçanta prej fibrash karboni që hapen lart, megjithëse janë bërë disa përshtatje të vogla për ta lehtësuar hyrjen dhe daljen nga kabina. Pajisje standarde është ulësja e re Touring prej fibrash karboni, ndërsa pa pagesë shtesë ofrohet edhe ulësja më sportive prej fibrash karboni e përdorur në Coupé.
Sipas drejtorit ekzekutiv të Aston Martin, Adrian Hallmark, Valhalla Spider synon të bashkojë komoditetin e përdorimit të përditshëm me aftësitë për drejtim në pistë, duke shtuar edhe kënaqësinë e një makine me çati të hapur.
“Me shpejtësi të lartë apo të ulët. Në shi apo në diell. Me çati apo pa çati. Në rrugë apo në pistë. Valhalla Spider i plotëson të gjitha kërkesat”, deklaroi Hallmark.
Aston Martin Valhalla Spider pritet t’u dorëzohet klientëve në tremujorin e tretë të vitit 2027. Çmimi nuk është publikuar ende, ndërsa modeli do të pozicionohet krahas Coupé si një tjetër alternativë me performancë të lartë në gamën e kompanisë. /Telegrafi/
Burimi: www.albeu.com
