Austria do të hapë një hetim parlamentar mbi përdorimin e syzeve inteligjente, në një kohë kur rriten shqetësimet për cenimin e privatësisë dhe incizimin e fshehtë të qytetarëve. Lajmin e bëri të ditur të mërkurën sekretari i shtetit për dixhitalizim, Alexander Pröll, i cili paraqiti një propozim me tre faza për rregullimin e kësaj teknologjie.
Kufizimet për regjistrimin e imazheve dhe zërit
Sipas transmetuesit publik austriak ORF, syzet inteligjente, të cilat mund të pajisen me kamera, mikrofonë dhe funksione të inteligjencës artificiale, do t’i nënshtrohen kufizimeve të veçanta për regjistrimin e imazheve dhe të zërit.
Propozimi parashikon ndalimin e regjistrimeve në ambiente të ndjeshme, si shkollat, kopshtet, dhomat e zhveshjes, tualetet, gjykatat, burgjet, si dhe objektet policore e ushtarake. Ndërkohë, në hapësirat publike, regjistrimet duhet të jenë qartësisht të dukshme për personat e tjerë.
Ekspertët dhe qëllimi i hetimit
Sipas Pröll, hetimi parlamentar do të përfshijë ekspertë të shkencës, teknologjisë dhe mbrojtjes së të dhënave, si dhe përfaqësues të personave që mund të preken nga përdorimi i këtyre pajisjeve.
Autoritetet austriake kanë përjashtuar mundësinë e një ndalimi të plotë të syzeve inteligjente, duke synuar të gjejnë një ekuilibër mes zhvillimit teknologjik dhe mbrojtjes së privatësisë. Qëllimi është të parandalohet regjistrimi i njerëzve pa dijeninë ose pëlqimin e tyre, ndërsa teknologjia vazhdon të zhvillohet.
Burimi: euronews.al
