Universiteti i Evropës Juglindore (UEJL) në Tetovë ka shënuar sot 25-vjetorin e themelimit, ndërsa në këtë ceremoni ka rënë në sy mungesa e krerëve dhe funksionarëve qeveritar të VLEN-it, shkruan portali Zyrtare.
Burime brenda VLEN-it bëjnë të ditur se kryetarët e VLEN-it, Izet Mexhiti dhe Bilall Kasami, kanë qenë të ftuar në ceremoninë e jubileut, ku ishte paraparë edhe shpallja e Abdylmenaf Bexhetit për doktor honoris causa, por që të dy kanë refuzuar të marrin pjesë.
Bojkotimi i ceremonisë
Sipas këtyre burimeve, VLEN ka bojkotuar ceremoninë për shkak të afërsisë së menaxhmentit të universitetit me Bashkimin Demokratik për Integrim (BDI), veçanërisht të rektorit të deridjeshëm, Abdylmenaf Bexhetit, i cili në vazhdimësi është parë si i afërt me këtë parti.
Jo më larg se para disa ditësh, Bexheti është fotografuar në një aktivitet në afërsi të kryetarit të BDI-së, Ali Ahmeti.
Polemikat rreth universitetit
UEJL, ndërkohë, nuk ka qenë rrallë në fokus të mediave dhe opinionit publik. Edhe zgjedhja e rektorit të ri, Sadudin Ibraimi, ishte përcjellë me diskutime dhe pikëpyetje në opinion, lidhur me dyshimet për konflikt interesi dhe përmbushjen e kritereve të konkursit.
Burimi: www.gazetaexpress.com










